Mustafa mbron ministren: Dorëheqja e Hykmete Bajramit do tu jepte boshllëk vjedhësve të 2 milionë eurove që t’i fshehin gjurmët
Pas skandalit të avullimit të 2 milionë eurove nga Thesari i Shtetit ka reaguar edhe kryetari i Lidhjes Demokratike të Kosovës, Isa Mustafa.
Ai i ka dhënë mbështetje ministres së Financave Hykmete Bajrami. Ai e ka komentuar edhe kërkesën e PDK-së për dorëheqjen e ministres Bajrami.
“E përkrah plotësisht Ministren E Financave, Hykmete Bajrami në betejën e saj kundër kriminelëve që vodhën mbi 2 milion euro nga Thesari i shtetit. Shoh se dikush ka dëshirë dhe bën thirrje që ajo të japë dorëheqje. Por ata duhet ta kuptojnë se ministrja Bajrami nuk është aty për tu dorëzuar para hajdutëve duke krijuar boshllëk për fshehjen e gjurmëve të vjedhjes së parasë publike, por për tu ballafaquar me krimin dhe me hajdutët, ashtu siç po vepron me të drejtë ajo”, ka shkruar Mustafa në Facebook.
Ai u ka bërë thirrje organebe shtetërore të punojnë për zbardhjen e shpejtë të këtij rasti, që të kthehen paratë e vjedhura nga Buxheti i Shtetit dhe kriminelët të përgjigjen para ligjit.
