Murati, mesazh veteranëve të UÇK-së: Mos u dëshpëroni nga fjalët dhe diskursi politik
Kryetari i Lëvizjes për Bashkim, Valon Murati, në Ditën e Veteranit, ka shkruar se lufta e Ushtrisë Çlirimtare është lëvizja më e lavdishme, që rezultoi me çlirim dhe pavarësi të Kosovës.
Ai u është drejtuar veteranëve të luftës së UÇK-së, duke u thënë se nuk duhet të dëshpërohen nga “fjalët dhe diskursi afatshkurtër politik”.
Murati ditën e sotme ia ka uruar veçanërisht njërit prej komandantëve të UÇK-së, Sali Mustafës, i cili para disa ditësh u dënua me 26 vjet burgim nga Gjykata në Hagë.
Shkrimi i plotë i Muratit:
Lufta e UÇK-së është përmbyllja më e lavdishme dhe e dinjitetshme e luftës për liri të të gjithë shqiptarëve që rezultoi me çlirimin dhe pavarësimin e Kosovës. Sot është Dita e Veteranit dhe të gjithë veteranët e UÇK-së duhet të jenë krenar që kanë qenë në kohën dhe vendin e duhur në anën më të ndritshme të historisë sonë. Asnjëherë nuk duhet dëshpëruar nga fjalët dhe diskursi afatshkurtër politik sepse në planin afatgjatë nuk ka kush që e lëviz këtë luftë dhe UÇK-në nga pediestali më i lartë i historisë kombëtare dhe asaj të njerëzimit. Sot ndër të tjera i kujtojmë shokët e udhëheqësit e UÇK-së që padrejtësisht po mbahen në Hagë. Personalisht këtë ditë dua t’ia uroj shokut tim, luftëtarit të lirisë Sali Mustafës, komandant Calit e i cili jo vetëm këto ditë feste, por çdo ditë në Kosovën e lirë për të cilën ai dha gjithçka, po na mungon shumë. Urime Cal ty dhe shokëve të tjerë në Hagë.
Postimi i plotë:
