Milaim Zeka: Gjykata Speciale i dinë vrasësit e Ahmet Krasniqit, Enver Malokut dhe Xhemajl Mustafës

Kryetari i Partisë Euroatlantike të Kosovës (PEK) njëkohësisht deputet në Kuvendin e Kosovës, Milaim Zeka, ka thënë se ai është marrë në biseda informative nga Gjykata Speciale.

Zeka në RTV Dukagjini, ka thënë se është marrë në biseda informative nga Gjykata Speciale, por thotë se nuk e ka bërë shumë të madhe, pasi ishte ftuar gojarisht.

“Jam ftuar për dy raste. Faktikisht kam kërkuar vet që të sqarohem në Gjykatën Speciale për vrasjen e Ahmet Krasniqit, pasi kam qenë njeriu i parë që jam akuzuar nga Millosheviqi dhe një gazetë në Kosovë. Gazetari i këtij mediumi për fat të keq ka cituar Millosheviqin, i cili me gjasë ma ka përzier emrin”, tha Zeka.

Ish-reporter i luftës thotë se ka kaluar një vuajtje të madhe pasi në Prishtinë gjatë viteve 2003-2004 kanë qarkulluar postera, ku ai akuzohet për vrasjen e Ahmet Krasniqit.

“Millosheviqi në Tribunal të Hagës e pyet një spiun të UDB-së: ‘A ke dëgjuar për Milaim Zekën?’, ai ia kthen: ‘Po kam dëgjuar’. Millosheviqi i thotë përsëri: ‘A ke dëgjuar se Milaim Zeka me urdhër të Rexhep e Sylejmen Selimit e ka vrarë Ahmet Krasniqin në Tiranë?’. Ky thotë: ‘Jo këtë nuk e kam dëgjuar’. Nga ai moment kam qenë personi publik më i akuzuar dhe asnjëri nga shokët e mi të luftës nuk më kanë mbrojtur dhe janë tallur”.

Zeka thotë se është pyetur edhe për Rastin Kiçina dhe për një rast tjetër kur një i burgosur kishte deklaruar se “Milaim Zeka ma ka shpëtuar jetën në një burg të UÇK-së në Kukës”.

Ai tutje ka thënë se është i bindur se Gjykata Speciale e din se kush janë vrasësit e Ahmet Krasniqit, Enver Malokut dhe Xhemajl Mustafës. /Ballkani.info/

loading…