Mësohen datat e ndeshjeve të ardhshme të Feronikelit në Evropë

Kampioni i Kosovës, Feronikeli do të përballet me Slovan Bratislava në rrethin e dytë kualifikues për garën dytësore evropiane, Ligën e Evropës, pasi njëlloj si klubi kosovar edhe klubi sllovak u eliminua nga rundi i parë kualifikues për Ligën e Kampionëve të mërkurën.

Ndeshja e parë mes Feronikelit dhe Slovan Bratislavas do të zhvillohet në Sllovaki, të mërkurën, më 24 korrik, në orën 18:00. Ndërsa, ndeshja kthyese, në “Fadil Vokrri”, do të zhvillohet gjashtë ditë më vonë, të martën e 30 korrikut, në orën 18:00.

Bratislava përjetoi rrëzim të dhimbshëm nga rruga për t’u kualifikuar në garën më prestigjioze evropiane për klube, sepse humbi 3-2 ndaj Sutjeska pas gjuajtjeve të penalltive, pasi loja e rregullt dhe ajo shtesë e kthimit mes tyre mbaroi baras 1-1, njëjtë si ajo e para.

Si rrjedhojë, klubi sllovak do të përballet me “Niklin”, klubin nga Drenasi, të cilit të martën iu shua ëndrra për ta vazhduar luftën në mënyrë që ta sigurojë një vend në fazën grupore të Ligës së Kampionëve pasi u mund në Prishtinë nga klubi uellsian The New Saints.

Fitues i dyfishtë në Kosovë, kampionatit dhe kupës, Feronikeli ishte afër kalimit në rundin e dytë kualifikues të Ligës së Kampionëve pas një barazimi dramatik me rikthim (2-2) në Uells, por u mposht 0-1 në stadiumin “Fadil Vokrri” përkundër se ishte skuadër dominuese dhe krijoi më shumë.

“Nikli” u bë skuadra e dytë kosovare që arrin kaq larg në kualifikime për këtë garë, pas Dritës, por e lëshoi mundësinë për t’u bërë e para në histori të futbollit kosovar që e arrin të paktën rundin e dytë kualifikues.

Sidoqoftë, klubi nga Drenasi tani do ta vazhdojë rrugën për ta siguruar kualifikimin në një garë evropiane, Ligën e Evropës, garën e dytë për nga rëndësia.