Më shumë se 100 persona janë arrestuar në Londër pasi protesta të tjera u zhvilluan në disa qytete pas sulmit me thikë në Southport.
Një makinë policie u dogj pasi një grup i madh njerëzish u mblodhën në zonën e Murray Street të Hartlepool të mërkurën në mbrëmje. Oficerët u sulmuan me shishe qelqi e vezë, tha policia e Cleveland.
Në Mançester, demonstruesit dolën në një numër të madh jashtë hotelit Holiday Inn në Oldham Road rreth orës 18:00 të mërkurën, raportoi Manchester Evening News.
Rreth 40 persona, për të cilët gazeta raportoi se përfshinin fëmijë dhe burra të veshur me kapuç, u mblodhën jashtë ambienteve të Oldham Road në atë që gazeta tha se “dukej si një qëndrim kundër azilkërkuesve që aktualisht strehohen në hotel”.
Në Londër, një protestë e madhe u organizua nën titullin “Mjaft është Mjaft”, me arrestime të bëra pasi demonstruesit u përleshën me oficerët në Whitehall të mërkurën, shkruan The Guardian, transmeton Gazeta Express.
Policia Metropolitane tha: “Mbi 100 persona janë arrestuar për vepra, duke përfshirë veprime të dhunshme, sulmin ndaj një punonjësi të urgjencës dhe shkeljen e kushteve të protestës. Disa oficerë pësuan lëndime të lehta”.
Demonstruesit u panë duke gjuajtur kanaçe birre dhe shishe qelqi në një linjë policie me pajisje për protesta përpara Downing Street dhe duke hedhur flakë mbi statujën e Winston Churchill në Sheshin e Parlamentit.
Në këto protesta u dëgjua thirrja “ne duam vendin tonë të kthehet” dhe “Oh Tommy Robinson”, duke iu referuar aktivistit të krahut të djathtë.
Policia e Merseyside tha se më shumë se 50 oficerë policie u plagosën në një “sulm të qëndrueshëm dhe të egër”. Policia tha se dhuna besohej të kishte përfshirë mbështetës të Ligës Angleze të Mbrojtjes.
Ajo shtoi se ata që qëndronin pas dhunës ishin ndezur nga postimet në mediat sociale që sugjeronin gabimisht një lidhje me islamin në lidhje me sulmin me thikë.
Një djalë 17-vjeçar është akuzuar për vrasjen e tri vajzave. Alice Dasilva Aguiar, nëntë vjeçe, Bebe King, gjashtë vjeçe dhe Elsie Dot Stancombe, shtatë vjeçe, u goditën për vdekje me thikë të hënën në një klasë kërcimi në Hart Street në Southport, Merseyside.
Tetë fëmijë të tjerë kanë marrë plagë me thikë, pesë prej tyre në gjendje kritike. Dy të rritur gjithashtu u plagosën rëndë.
Të akuzuarit i është caktuar masa e paraburgimit për t’u paraqitur në gjykatën e Liverpool, Derby Square, të enjten.







