Mbyllet pjesa e parë në “Fadil Vokrri”: Feronikeli, 45 minuta larg historisë
Vetëm 45 minuta e ndajnë Feronikelin nga realizimi i ëndrrës dhe shkrimi i historisë. Klubi drenicas mund të bëhet klubi i parë kosovar në histori që e arrin rrethin e dytë kualifikues në Ligën e Kampionëve.
Pjesa e parë e përballjes mes Feronikelit dhe The New Saints në stadiumin “Fadil Vokrri” në Prishtinë, në kuadër të rrethit të parë kualifikues në Ligën e Kampionëve, është mbyllur me barazim pa gola (0-0).
Klubi nga Drenasi mund të kalojë në rundin e dytë kualifikues me çfarëdo fitore dhe madje edhe me barazim pa gola dhe 1:1. Barazimi 2:2 e çon ndeshjen në kohën shtesë dhe penallti potencialisht, ndërsa çfarëdo humbje apo çfarëdo barazimi 3:3 dhe më lart e eliminon Niklin.
Paraqitja e klubit kosovar në pjesën e parë i lë mbi tetë mijë tifozët e pranishëm në stadium dhe stafin e Feronikelit të shpresojnë se ata do ta vazhdojnë edhe më tutje rrugëtimin në këtë garë prestigjioze të Evropës.
Kampioni i Kosovës e dominoi plotësisht ndeshjen sa i përket numrit të rasteve të krijuara për të shënuar gol, përkundër që kampioni uellsian e pati dominimin në posedim të topit.
Formën e mirë djemtë e Zekirija Ramadanit e shfaqën qysh në fillim të ndeshjes, kur Besmir Bojku e bëri një goditje të mirë në drejtim të portës, pas një depërtimi të mirë të Mendurim Hotit. Megjithatë, ky rast i krijuar qysh në minutën e tretë nuk u konkretizua në gol.
Edhe minutat e tjerë të pjesës së parë vazhduan me të njëjtën histori: Feronikeli krijonte mundësi të mira për të shënuar, mirëpo goditja e fundit ose devijohej nga mbrojtësit, ose shkonte jashtë kuadratit të portës.
Mevlan Zeka, Astrit Fazliu – të cilët shënuan në ndeshjen e parë mes këtyre dy skuadrave në Uells -patën raste të mira gjatë 45 minuta të parë të kësaj përballjeje, mirëpo tentimet e tyre nuk u konkretizuan në gola, duke bërë që pjesa e parë t mbyllej pa gol nga ana e drenicasve.
Përkundër që Feronikeli ishte më i rrezikshëm në këtë pjesë të parë, The New Saints dominoi në aspektin e posedimit të topit. Megjithatë, uellsianët nuk arritën të krijojnë raste me këtë posedim të topit dhe Jamie Mullan ishte i vetmi lojtar i TNS që pati rast për ta kaluar në epërsi skuadrën e tij.
Rreth katër minuta para fundit të pjesës së parë, Aeron Edwards u ndëshkua me karton të verdhë për një ndërhyrje të ashpër ndaj Fazliut, i cili megjithatë e vazhdoi lojën pas një trajtimi nga stafi mjekësor.
Vetëm disa momente para se gjyqtari ta sinjalizonte fundin e pjesës së parë, Mevlan Zeka e pati një rast tjetër të mirë, mirëpo mbrojtësi i TNS e ndali aksionin duke e devijuar topin.
Njëri ndër rastet më të mira në 45 minutat e para të lojës i erdhi Albert Dabiqajt, në minutën e dytë shtesë të pjesës së rregullt. Mirëpo, goditja e tij nuk shkoi brenda kuadratit të portës.
Në rast kalimi në rundin e dytë kualifikues, Feronikeli do të përballet me klubin danez Kobenvahn.
Por as eliminimi nuk është fundi për kampionin e Kosovës, pasi humbësi i këtij dueli do të ketë mundësi ta vazhdojë ëndrrën për kualifikim në garat evropiane.
Humbësi do të takohet me fituesin e duelit mes Slovan Bratislava dhe Sutjeska në kualifikime për garën dytësore evropiane, Ligën e Evropës.
