Lojërat Olimpike

Macron premton se nuk do të ketë flamur rus në Lojërat Olimpike “Paris 2024”: Rusia nuk ka vend, ka kryer krime lufte

Presidenti i Francës, Emmanuel Macron, ka premtuar në një intervistë për gazetën “L’Equipe” se flamuri rus nuk do të jetë në Lojërat Olimpike në Paris vitin e ardhshëm.

Për momentin, Komiteti Olimpik Ndërkombëtar (IOC) nuk ka marrë ende një vendim për pjesëmarrjen e sportistëve rusë, megjithëse presidenti francez thotë se ka “besim të plotë” te Thomas Bach.

Në fund të korrikut, presidenti i IOC njoftoi dërgimin e 203 ftesave për të marrë pjesë në Lojërat Olimpike të Parisit 2024, por mes tyre nuk janë ato të komiteteve olimpike të Rusisë dhe Bjellorusisë, pjesëmarrja e të cilëve është pezulluar për shkak të pushtimit nga këto vende të Ukrainës.

Ekziston mundësia që IOC të pranojë disa atletë nga këto vende nën një flamur neutral, për sa kohë që ata nuk kanë asnjë lidhje ushtarake. Ministria ruse e sportit kohët e fundit pranoi mundësinë e pjesëmarrjes si ‘neutrale’, një kusht që Rusia e refuzonte gjithmonë më parë.

Megjithatë, IOC ka këmbëngulur që flamujt, himnet dhe simbolet e të dy vendeve duhet të mbeten të ndaluara dhe pretendon se nuk është marrë asnjë vendim për përfshirjen e të dy vendeve në Paris 2024.

“Mendoj se ka një konsensus, sepse Rusia si vend nuk ka vend, në një kohë kur ka kryer krime lufte, kur deporton fëmijët”,- tha presidenti francez për “L’Equipe”.

“Nuk është shteti pritës ai që duhet të vendosë se çfarë duhet të bëjë IOC” në lidhje me nëse do të ftojë atletët rusë dhe bjellorusë për të garuar si neutralë, por ai tha se kishte “besim të plotë” te Bach.

“Pyetja e vërtetë që bota olimpike do të duhet të vendosë është se çfarë vendi t’u japë këtyre atletëve rusë, të cilët ndonjëherë janë përgatitur për një jetë, dhe që gjithashtu mund të bien viktimë e këtij regjimi,”- shtoi Macron.