Për dallim nga ambasadori britanik në Kosovë Ruari O’Connell që është ndier i turpëruar nga rezultatet e institucioneve të drejtësisë në luftimin e korrupsionit, Kryeprokurori i Shtetit, Aleksandër Lumezi po ndihet krenar në atë çka institucioni që e udhëheqë ai e quan sukses në luftën kundër korrupsionit.

Kjo erdhi pas raportimit të kryetarit të komisionit mbikëqyrës për zbatimin e planit strategjik për luftimin e korrupsionit, Haxhi Dërguti.

“Rezultatet e punës tonë flasin se akuzat ndaj Prokurorisë së Shtetit janë retorikë e forumeve të ndryshme”, ka thënë Lumezi në mbledhjen e KPK-së.

Ai e ka përmendur edhe një fakt që sipas tij dëshmon përkushtimin e tyre për ta luftuar korrupsionin.

“Një pjesë e madhe e kallëzimeve penale janë nga qytetarët. Kjo e dëshmon se është duke u rritur besueshmëria në Prokurorinë e Shtetit. Qytetarët janë aleatet tonë” , ka thënë ai.

Lumezi po i gëzohet edhe faktit që mbi 49 për qind e kallëzimeve penale nga Policia e Kosovës që procedohen në PSh hedhen poshtë.

“Jam krenarë me prokuroret për këtë për shkak se kjo dëshmon që prokuroret nuk ngrisin aktakuza pa fakte”, ka thënë ai.

Kosova ka kthyer vetëm 28 mijë euro nga pasuria e fituar përmes veprave penale

Para Këshillit Prokurorial të Kosovës është duke raportuar Koordinatori kombëtar për luftimin e krimeve ekonomike, Shqipdon Fazliu.

Ai ka paraqitur shifrat e pasurisë së ngrirë (sekuestruar) dhe pasurisë së konfiskuar me vendim të formës së prerë të gjykatës. Prej muajit korrik deri në muajin shtator është ngrirë pasuri në vlerë mbi 300 mijë euro, raporton Koha Ditore.

Nga pasuria e fituar përmes veprave penale, Kosova këtë vit ka kthyer vetëm 28 mijë euro.

“Nuk është ndonjë vlerë e madhe megjithatë është rast për të cilat kanë përfunduar të gjitha procedurat në gjykatë”, ka thënë Fazliu.

Ai ka ngritur para KPK-së një tjetër problematikë. Sipas tij rastet që iniciohen si raste parapenale po vonojnë të kalojnë në raste penale.

Kjo sipas tij ka bërë që një rast ku janë të përfshirë zyrtarë të një ministrie që dyshoheshin për korrupsion të parashkruhet për shkak të mosbartjes së rastit nga rasti parapenale në atë penal.

Rastet parapenale janë ato raste të cilat nuk janë hetime të mirëfillta por vetëm grumbullim i informatave për të parë nëse ka bazë për hetime ndërsa rast penale është ai rast për të cilin ka aktvendim për fillimin e hetimeve.