Labinot Tahiri, sa ishte deputet këmbënguli që qyteti i tij, Ferizaji të përfaqësohet në qeveri.

Ai këtë e arriti, pasi partia në të cilën bënte pjesë AKR-ja, e bëri ministër të Punëve të Brendshme, Ekrem Mustafën që vije nga Ferizaji në qeverinë “Haradinaj”, pasi paraprakisht  u shkarkuan dy ministra të tjerë.

Qyteti i Labit nuk do të mbetet pa përfaqësim nëse veç arrihet të formohet qeveria “Kurti”.

Kreu i VV-së, sot prezantoi emrat e 5 ministrave nga radhët e partisë së tij dhe një zv.kryeministri, ende pa arritur marrëveshje me LDK-në.

Haki Abazit që vije nga Ferizaji, i cili iu bashkua VV-së në zgjedhjet e 6 tetorit, Kurti ia besoi hiç më pak se pozitën e zv.kryeministrit të dytë.

Këtë e vlerëson ish-deputeti Tahiri i cili thotë se ka parë listën e ministrave të propozuar dhe sipas tij Kurti ka bërë zgjidhjen e duhur.

“Pritja e qytetarëve duhet të marrë fund rreth formimit të qeverisë ‘Kurti’. Sa i përket ministrave ka bërë përzgjedhjet e duhur. Përzgjedhja e Haki Abazit si zv.kryeministër tregon se Ferizaji ka njerëz me vlera”, ka thënë Tahiri, për Reporteri.net.

Kujtojmë se përveç Abazit si zv.kryeministër, Kurti si ministra nga VV ka propozuar: Albulena Haxhiun (ministre e Drejtësisë), Blerim Reka (ministër i Punëve të Jashtme dhe Diasporës), Besnk Bislimi (ministër i Financave dhe transfereve), Rozeta Hajdari (ministre e Ekonomisë, Tregtisë dhe Industrisë) dhe Arben Vitia (ministër i Shëndetësisë dhe sportit)./Ballkani.info/