Kryeziu ‘vajton’ rrëzimin e Qeverisë Kurti, thotë se Kuvendi nuk përfaqëson qytetarët
Zëdhënësi për media i Qeverisë Kurti, Përparim Kryezu është deklaruar lidhur me rënien e kësaj Qeverie për të cilën thotë se u rrëzua në Kuvend kundër vullnetit të qytetarëve, me vullnetin e të cilëve u ngrit kjo Qeveri.
Duke publikuar rezultatet e raportit “Pulsi Publik 18” nga UNDP, ku thuhet se niveli i kënaqshmërisë së regjistruar me punën e Kryeministrit është 65.4%, kurse me punën e Kryetares së Kuvendit ka arritur në vlerën rekord prej 72.4%, Kryeziu theksoi se 2/3 e deputetëve në Kuvend rrëzuan Kryeministrin dhe Qeverinë që sipas tij e aprovojnë 2/3 e qytetarëve.
“Qeveria Kurti, ndonëse në detyrë dhe në përballje me një krizë të trefishtë – shëndetësore, ekonomike dhe politike – ka aprovimin e 60.7% të qytetarëve të Republikës së Kosovës. Në demokraci legjitimiteti buron nga qytetarët kurse jetëgjatësia e qeverisë varet nga aprovimi i tyre për punën e saj. Qeveria Kurti u ngrit me pëlqimin dhe mbështetjen e qytetarëve, kurse u rrëzua në kuvend kundër vullnetit dhe pa aprovimin e tyre. 2/3 e deputetëve në kuvend rrëzuan Kryeministrin dhe Qeverinë që e aprovojnë 2/3 e qytetarëve. Kë përfaqëson kuvendi sot? Qytetarët jo”, ka shkruar Kryeziu në profilin e tij në Facebook.
Ndërkaq, lidhur me këtë raport të publikuar nga United Naion Development, program ky i Kombeve të Bashkuara për të ndihmuar vendet e varfra dhe vendet në zhvillim, së fundmi ka reaguar edhe ambasadori i Gjermanisë në Kosovë, Christian Heldt, i cili ka publikuar raportin në Twitter, ku tutje ka thënë se duhet të lexohet patjetër, veçanërisht në situatën aktuale.
“Absolutisht duhet të lexohet, veçanërisht në situatën aktuale.
Nivelet e besimit në institucionet përkatëse, ndjenja ndaj korrupsionit, rekrutimi i bazuar në merita në sektorin publik, etj flasin vetë. Statistikat flasin”, ka shkruar Heldt në Twitter.
Absolute must read, especially in the current situation.
Trust levels in respective institutions, feeling about corruption, merit-based recruitment in the public sector etc speak for themselves. Statistics talk. https://t.co/Z9QgZLLgyv— Ambassador Christian Heldt (@GermanAmbKOS) May 30, 2020
Sipas këtij raporti, intervistat janë zhvilluar përmes telefonit si pasojë e situatës pandemike kudo në botë, COVID-19, me gjithsej 1306 intervistues.
Në raport, paraqitet gjendja e kënaqshmërisë e të gjitha institucionet të vendit si dhe të liderëve politik për punën që e kanë kryer dhe janë duke e kryer.