Kryetari i PDK’së, Memli Krasniqi ka folur në hapjen e fushatës së Uran Ismailit “Koha për Prishtinën”, ku në fjalimin e tij, ka treguar për punën dhe vullnetin që Ismaili ka për ta drejtuar kryeqytetin.
Krasniqi tha se Uran Ismaili kujtohet si ministër i drejtë e i suksesshëm që solli rezultate të prekshme, e këtë stil të punës, thotë se do ta ketë edhe si kryetar i ardhshëm i Prishtinës.
“Unë e Urani jemi rritur bashkë. Karriera e Uranit flet vet. Kur e merr diçka përsipër e qon deri në fund. Këtë e ka dëshmu si student, si aktivist, si ministër, si deputet. Urani si ministër solli transparencë, diciplionë. Sot me të drejtë qytetarët e kujtojnë si ministrin më të mirë e më të suksesshëm që solli rezultate të prekshme. Të njëjtin stil pune do ta sjell edhe në Prishtinë”, tha Krasniqi.
Në këtë tubim, Ismaili do të shpalosë programin e tij zgjedhor dhe pesë zgjidhjet kryesore për një Prishtinë funksionale dhe të jetueshme, duke prezantuar gjithashtu edhe ekipin e asambleistëve me të cilët synon të qeverisë kryeqytetin në katër vitet e ardhshme. Ai ka paralajmëruar se për secilën lagje të Prishtinës do të ketë plane dhe buxhet të dedikuar, të cilat do t’u përgjigjen drejtpërdrejt problemeve specifike të banorëve.







