Admir Laliq

Kosova, Shqipëria e Mali i Zi në kërkim të dy shtetaseve të huaja të zhdukura në Alpet Shqiptare

Dy gra, njëra gjermane dhe tjetra polake, dyshohet se janë zhdukur në rajonin e Alpeve Shqiptare.

Lajmin e ka bërë të ditur Admir Laliq, drejtor i Parqeve Kombëtare në Mal të Zi, në llogarinë e tij private në Facebook. Postimi i tij është shpërndarë shumë edhe nga alpinistët në Kosovë e rajon.

Ajo që dihet, sipas Laliqit, është se dy gratë kishin hyrë në Mal të Zi nga Shqipëria përmes pikëkalimit në Vermosh me veturën e tyre më 13 gusht.

“Më 14 gusht ato kanë kontaktuar me familjet e tyre dhe që nga ajo kohë janë zhdukur. U kemi gjetur veturën e tyre në një parking në komunën e Plavës. Ju lutem të shpërndani fjalët dhe të shpresojmë se janë diku në malet e Kosovës, Shqipërisë e Malit të Zi”, ka shkruar më tej ai teksa ka lutur qytetarët që të kontaktojnë autoritetet nëse dinë diçka për to.

Tamara Paviqeviq, zyrtare për media në Policinë e Malit të Zi, ka thënë për KTV-në se dy shtetaset e huaja të raportuara si të zhdukura, realisht nuk janë raportuar të zhdukura në territorin e Malit të Zi.Rrjedhimisht, sipas saj, Policia malazeze nuk ka hapur rast meqë nuk konsiderohen të zhdukura brenda territorit malazez.

Sipas informatave jozyrtare, pasi e kanë lënë veturën në Plavë, ato dyja kanë kaluar në territorin e Shqipërisë për të shkuar në një fshat në të cilin rëndom grumbullohen alpinistët.Që nga kjo kohë më nuk dihet asgjë për to. Andaj Policia malazeze sugjeron të gjitha palët e interesuara për këtë rast t’i referohen policisë në Shqipëri me besimin se në Shqipëri, dy gratë ndoshta janë raportuar si të zhdukura.

Ndërkaq, nga policia komunale në Plavë kanë thënë se pavarësisht rrethanave të pasqaruara megjithatë të gjitha organet, përfshirë edhe qytetarë, janë aktivizuar në kërkim të grave të zhdukura.Kurse Policia e Kosovës, në interesimin për rastin, kanë kthyer një përgjigje që s’jep asnjë detaj për rastin.

“Lidhur me rastin të cilit ju keni referuar ju informojmë se, Policia e Kosovës i posedon informacionet e pranuara nga autoritetet e Malit të Zi me të cilët ka bashkëpunim të mirë dhe të njëjtat informacione është duke i trajtuar në aspektin policor”, thuhet në përgjigjen e Policisë së Kosovës.Në anën tjetër, mediat në Shqipëri kanë raportuar të hënën se policia ka nisur kontrollet në zonë dhe autoritetet në Mal të Zi, Kosovë dhe Shqipëri, po bashkëpunojnë për gjetjen e tyre.

loading…