Konjufca: Çmimin e energjisë duhet me ua rritë atyre që nuk e kanë gajle sa shpenzojnë

Kryetari i Kuvendit, Glauk Konjufca, foli në Rubikon të Klan Kosovës për krizën energjetike në Kosovë.

Konjufca tha se çmimi i energjisë elektrike është i lirë, por që sipas tij kjo duhet konsideruar si fatmirësi.

“Është fatmirësi që është e lirë, për shkak të resurseve tona që i kemi edhe për 1 mijë vitet e ardhshme”, tha Konjufca.

“Për 300 mijë qytetarë që janë të varfër rryma është e shtrenjë, por krahasuar me koston në rajon, është e lirë. Me qenë me ndihmë sociale, edhe me të ardhur rryma 50 euro, është shtrenjtë”, shtoi tutje Konjufca.

Nënkryetari i Lëvizjes Vetëvendosje tha se çmimi i energjisë elektrike nuk mund të zbritet me vendim të qeverisë.

Konjufca tha se në bazë të situatës duhet ri-kthyer bllok-tarifa, për ata që nuk kursejnë rrymën.

“Koston me ua rritë atyre që nuk e kanë gajle sa shpenzojnë, ata që e lënë nxemjen lëshuar tërë natën në një dhomë ku nuk ka nevojë. Me bllok-tarifë për ty e për mua rritet, por për atë të varfrit jo”, u shpreh krye-kuvendari.

Konjufca po ashtu paralajmëroi se do të detyrohen të marrin masa njësoj si Maqedonia e Veriut e Shqipëria.

Sa i përket kursimit të rrymës, Konjufca tregoi se fatura në shtëpinë e tij ka qenë veç 20 euro në muajin korrik.