“Koeficienti i zbrazjes së Kosovës”, Abdixhiku: Goditje ndaj mjekëve, mësuesve, policëve, ushtarëve

Kryetari i Lidhjes Demokratike të Kosovës, Lumir Abdixhiku ka reaguar pas publikimit të koeficientit të pagave me vlerë 105 euro.

Ai e ka quajtur si koeficienti i zbrazjes së Kosovës.

Sipas Abdixhikut në krizën më të madhe ekonomike e sociale ndër vite, Qeveria sërish tregoi pandjeshmëri.

“Pandjeshmëri ndaj përballjes qytetare, ndaj rritjes së kostos së jetesës, ndaj vet njerëzve të këtij vendi. Koeficienti në vlerë prej vetëm 105 është goditje e radhës ndaj mjekëve, mësuesve, policëve, ushtarëve e gjithë shërbyesve publik. Është braktisje e njerëzve të vendit; që shkakton braktisjen e tyre të vendit. LDK-ja ka propozuar koeficient në vlerë prej 125. Gjithçka më pak se aq është ulje e pagave për disa e mosrritje për të tjerët. Është injorim i inflacionit e kushteve të rënduara të jetesës. Këtë propozim do të dërgojmë menjëherë edhe si amandament në Kuvend.”, ka shkruar ai.

Sipas tij, kjo tregon për një qeveri të shpërputhur nga realiteti të cilën vendi  ynë nuk e meriton.

“Kosova meriton më mirë, Kosova mundet më shumë!”, ka shkruar ai.

Postimi i plotë: