“Kjo nuk më ka ndodhur kurrë, sa shumë miqësorë” – disa nga reagimet më të mira të tifozëve anglezë në rrjetet sociale

Qytetarët e Kosovës ia kanë bërë një prej promovimeve më të mëdha vendit të tyre me rastin e mikpritjes së anglezëve në ndeshjen kualifikuese për ‘Euro 2020’ që u zhvillua të dielën në stadiumin “Fadil Vokrri” në Prishtinë.

Gjithçka ishte e përsosur duke nisur nga banerët, mbishkrimet dhe flamujt nëpër qytet, sjellja dhe mikpritja e qytetarëve e deri te organizimi i jashtëzakonshëm i tifozëve brenda stadiumit.

Krahas futbollistëve dhe stafit të kombëtares së Anglisë, kanë qenë tifozët anglezë që kishin udhëtuar në vendin tonë, ata që janë mahnitur dhe befasuar më së shumti nga pritja që u është bërë këtu.

Më poshtë jua sjellim disa prej postimeve të shumta të tifozëve anglezë që e kanë vizituar Kosovën:

“Nuk mund të besoj se sa miqësor ka qenë gjithsecili deri më tani në Prishtinë. Madje edhe njerëzit që i merrnin pasaportat në aeroport ishin miqësorë. Kjo nuk ndodh kurrë…”, ka shkruar përdoruesi i Twitterit me emrin Karl Dolling.

“Kosovarët po na paguajnë birra, duan të dinë gjithçka për klubet që i mbështesim, vendi më miqësor ku kam shkuar ndonjëherë për të ndjekur një ndeshe, vend mahnitës”, është postimi William Owen Pond.

“Isha ulur duke pirë ca birra në Prishtinë. Hyn njëri, e paguan gjithë tavolinën për ne dhe del jashtë. Çfarë vendi…”, thotë Tom Burr.

“Jam i inatosur me veten se erdha në këtë udhëtim në Kosovë me shumë skepticizëm në krahasim me të gjitha udhëtimet që i kisha bërë deri më tash. Në fakt, me shumë mundësi do të jetë udhëtimi më i mirë që kam bërë. Vend i pabesueshëm”, është përshkrimi i përdoruesit të Twitterit me emrin James.

“Kosovë. Ke një vend të madh në zemrën time. Paramendo të jesh një tifoz i Anglisë dhe të mirëpritesh. Ky vend, këta njerëz… thjesht mbresëlënës”, ka shkruar Mark Hillman.

“Kam bërë disa udhëtime futbolli gjatë jetës, por Kosova tashmë është një prej vendeve më mikpritëse që i kam vizituar. Njerëz zemërgjerë dhe të sjellshëm ngado…”, ka shkruar përdoruesi me emrin Paul.