Këshilltari i kryeministrit Haradinaj, Erolld Belegu ka thënë se Bashkimi Evropian e ka humbur çdo kredibilitet për ndërmjetësim në dialgun Kosovë – Serbi.

Belegu, në emisionin “Përballje” me gazetarin Muhamet Hajrullahu në RTV Dukagjini, ka thënë se është për t’u çuditur se populli e bizneset janë kundër heqjes së taksës e politikanët mbështesin heqjen e taksës.

“Lojërat me taksën se unë jam më mik më Amerikën sesa ti, janë shumë qesharake”, tha Belegu.

Këshilltari i Kryeministrit ka thënë se pas vendosjes së taksës, është e dukshme se shumë kompani vendore kanë rritur shitjet dhe kanë shtuar numrin e të punësuarve.

“Kompania ‘Liri’ ka punësuar 40 punëtorë, dhe ka ngritje shumë të madhe në shitjen e produktit të saj ‘Sempre’. Kemi vizituar edhe kompaninë ‘Vipa’ dhe na kanë thënë se kanë ngritje të shitjeve prej 35% të produkteve të saj. Natyrisht bizneset kanë ende në stoqe produkte serbe”, tha ai, përcjell Tlegrafi.

Belegu ka thënë se deri më tani nuk ka ndonjë element që Serbia po i plotëson kushtet për largimin e taksës nga ana e Kosovës.

“Taksa nuk do të hiqet për shkak të pazareve me kufijtë. Po shihet se nëse do të hiqej taksa ndoshta do të arrihej një marrëveshje për lëvizjen e kufijve. Edhe pse zyrtarisht asgjë nuk ka”, tha ndër të tjera Eroll Belegu.