Këshilli i Prindërve vlerëson se testi i arritshmërisë dhe ai i maturës sivjet kanë dështuar

Këshilli i Prindërve i Kosovës të premten njoftoi se ka mbajtur mbledhjen e radhës, ku ndër të tjera ka diskutuar për çështjen e testeve të realizuara së fundmi në vend, atij të arritshmërisë dhe të maturës.

Në njoftim thuhet se kryesia e KPK-së ishte e njëzëshme në konkluzionin se këto testime dështuan të përmbushnin qëllimin e tyre.

“Këshilli i Prindërve i Kosovës e ka zhvilluar sot mbledhjen e radhës, ku e ka shqyrtuar dhe diskutuar angazhimin e KPK-së nëpër grupe të ndryshme punuese dhe tryeza diskutimi rreth çështjeve të arsimit. U vlerësua se dokumente të rëndësishme, e të mirëseardhura, janë në proces të përgatitjes (si Strategjia e Arsimit 2022-2026, Udhëzimi për Vlerësimin e Nxënësve në Arsimin Parauniversitar por edhe dokumenti, në proces të përpilimit, për Sigurinë në Shkolla), e ku KPK do të japë kontributin përmes komenteve e pjesëmarrjeve direkte”, thuhet në njoftim, përcjell Demokracia.com.

“KPK i kushtoi rëndësinë kryesore në këtë mbledhje çështjes së testeve të realizuara së fundmi në vend, atij të arritshmërisë dhe testit të maturës. Kryesia e KPK ishte e njëzëshme në konkluzionin se këto testime dështuan të përmbushnin qëllimin e tyre. Përgatitja dhe administrimi i këtyre testimeve vazhdoi të kishte mangësi e boshllëqe të shumta: si në shkallën e vështirësisë (të pa harmonizuar me periudhën e rëndë dyvjeçare që e kanë kaluar nxënësit e testuar por dhe mospërputhjes së profilit të lëndëve me peshën në test); gabimeve të evidentuara në përmbajtje; mangësisë në sigurisë dhe mbrojtje (me deklarime publike për ekspozim të tij nëpër grupe të ndryshme në internet) dhe me evidenca të shumta të dështimit në administrimin e tij (me kopjime dhe keqpërdorime të ndryshme)”, thuhet më tej në njoftim.

Këto teste, si të tilla, po lënë pasoja të rënda në vlerësimin e integritetit, drejtësisë dhe paanshmërisë, duke gërryer besueshmërinë dhe vlerën e arsimit publik në Kosovë. Humbësit më të mëdhenj nga ky proces rezultojnë të jenë nxënësit me integritet dhe familjarët e tyre, e fituesit më të mëdhenj nxënësit e pavetëdijshëm për dëmin që sjell kopjimi dhe keqpërdorimi nëpër testime (i toleruar dhe mundësuar nga mbikëqyrja dhe kontrolli i dobët).

Së këndejmi, testimet e tilla kërkojnë përmirësim fundamental që të jenë në shërbim të qëllimit, ose duhen pezulluar deri në pjekjen e kushteve për t’u realizuar me integritet dhe paanshmëri të plotë.

KPK po sot ka diskutuar edhe për çështje të tjera që do t’i ndihmonin organizimit më të mirë dhe arritjes së qëllimeve të këtij Këshilli, si dhe ka përcaktuar një sërë veprimesh për gjysmën e dytë të këtij viti.