KEK del me sqarim për skandalin e punësimeve: Bëni ankesa, do t’i shqyrtojmë me kujdesin më të madh
Pas nisjes së hetimeve nga Prokuroria Themelore në Prishtinë lidhur me dyshimet për manipulim të konkursi për punësim në Korporatën Energjetike të Kosovës, ka reaguar kjo e fundit, duke lëshuar një sqarim për opinionin. Në këtë konkurs të dyshimtë, Lëvizja Vetëvendosje është akuzuar se ka ushtruar ndikim për punësimin e të afërmve të saj.
Në këtë sqarim, KEK thekson se në konkursin për plotësimin e 150 pozitave të lira të punës, kishin aplikuar 4668 kandidatë, ku janë përzgjedhur 128 prej tyre. 17 pozita mbesin ende vakante, dhe sipas njoftimit, do të shpallen së shpejti edhe një herë.
“Korporata Energjetike e Kosovës njofton opinionin se pas përfundimit të procedurave të rekrutimit sipas shpalljes publike për plotësimin e 150 pozitave të lira, ku kishin aplikuar 4668 kandidat, janë publikuar rezultatet përzgjedhjes për 128 pozita. Ndërsa për 17 pozita ende të pa plotësuara vazhdon procedura e rekrutimit si dhe për 5 pozita për të cilat nuk kemi pasur kandidat të suksesshëm, do të rishpallen në një të ardhme të afërt”, thuhet në sqarimin e KEK.
KEK thotë se është duke përcjell me interesim të gjitha pretendimet për shkelje gjatë procesit të rekrutimit, përderisa siguron ankuesit se ankesat e tyre do të shqyrtohen me kujdes të madh.
“Pavarësisht faktit se KEK ka bërë përpjekje për të respektuar kriteret e shpalljes publike si dhe dispozitat ligjore të Ligjit të Punës në fuqi dhe detyrimeve ligjore të dala nga aktet nënligjore për çështjen e rekrutimit të punëmarrësve, KEK është duke përcjellë me seriozitet të gjitha pretendimet publike rreth shkeljeve eventuale gjatë procesit të rekrutimit. Në këtë drejtim, KEK ju siguron se të gjithë ankesat do të shqyrtohen me kujdesin më të madh, duke rishikuar procesin, do të korrigjohen gabimet e evidentuara si dhe do të merren masa adekuate konform ligjit, kudo që do të ketë pasur shkelje në proces”, thuhet tutje.
Po ashtu, KEK ka inkurajuar çdo aplikues që konsideron se i janë shkelur të drejtat e garantuara me dispozita ligjore, të parashtroj ankesë brenda afatit ligjor në komisionin e ankesave.
Sot, në orët e pasdites, Prokuroria Themelore në Prishtinë, njoftoi opinionin publik se Departamenti i Krimeve të Rënda, konkretisht Njësiti për Krime Ekonomike dhe Korrupsion, pas raportimeve të publikuara në disa portale lidhur me pretendimet se janë kryer shkelje të rënda ligjore në procesin e rekrutimit të qindra personave, ka hapur hetim.
