Identifikohet lokali në Skënderaj ku luheshin lojëra të fatit, ja çka u sekuestrua
Nën dyshimin e bazuar për ushtrimin e veprimtarisë së kundërligjshme ‘Organizim i skemave piramidale dhe bixhozit të paligjshëm’, mbrëmë hetuesit e Sektorit Rajonal të Hetimeve, në rrugën “Adem Jashari” në Skenderaj, kanë identifikuar një lokal ku ushtrohej veprimtari e lojërave të fatit.
Në lokalin ku dyshohej për veprimtari të dyshimta, në cilësi të provave materiale janë gjetur dhe janë sekuestruar:
“6 televizorë, 7 monitor, 7 shtëpiza te kompjuterit, 3 printer, 2 lexues të tiketave dhe gjësende të tjera që mund të shërbejnë si dëshmi për rastin në fjalë”, thuhet në njoftimin e Policisë së Kosovës.
Lidhur me rastin në cilësi të të dyshuarit është intervistuar një person i cili më pas është liruar në procedurë të rregullt.
“Ndërsa hetuesit policorë janë duke vazhduar me procedurat e mëtejme hetimore”, përfundon njoftimi.