Avdullah Hoti
Hoti: Kjo qeveri i ka bërë dëm të madh dhe afatgjatë integrimit euro-atlantik të Kosovës
Deputeti i LDK-së, Avdullah Hoti, ka thënë se Qeveria Kurti i ka bërë dëm të madh e afatgjatë integrimit të Kosovës.
Kjo deklaratë e Hotit vjen pasi kryeministri, Albin Kurti pranoi që Asociacioni është kusht për anëtarësimin e vendit në Këshillin e Evropës.
Ai ka renditur disa veprime të Kurti që kanë çuar në vendosjen e këtij kushti.
“Kjo qeveri i ka bërë dëm të madh dhe afatgjatë integrimit euro-atlantik të Kosovës, duke na kurthuar në një marrëveshje që nuk parasheh njohjen, që e liron Serbinë nga ky obligim në progresin e saj drejt BE-së.” – ka shkruar ndër të tjera ai.
Postimi i plotë:
- Qeveria aktuale në fillim të mandatit e braktisi dialogun për njohje reciproke, të nisur në qeverinë paraprake me mbështetje të aleatëve.
- Vendosi kushte për dialog, të cilat nuk u morën parasysh as nga ndërmjetësi i BE-së, e as nga aleatët.
- E nisi dialogun pa kushte.
- E pranoi marrëveshjen e Brukselit/Ohrit, e cila në qendër nuk e ka njohje reciproke, por i ka garancitë për vetë-menaxhim për komunitetin serb dhe kishën ortodokse serbe.
- Në nëntor 2023, e pranoi nga BE-ja draft-statutin e asociacionit, të cilin nuk e refuzoi.
- Tani çuditet pse dërgimi i atij drafti në Gjykatën Kushtetuese po i vendoset si kusht për anëtarësim në Këshillin e Evropës.
Kjo qeveri i ka bërë dëm të madh dhe afatgjatë integrimit euro-atlantik të Kosovës, duke na kurthuar në një marrëveshje që nuk parasheh njohjen, që e liron Serbinë nga ky obligim në progresin e saj drejt BE-së.