13 persona janë arrestuar pas një zjarri në ishullin grek të Hidrës, i cili sipas autoriteteve është shkaktuar nga fishekzjarrët e hedhura nga një jaht.

Zjarri, i cili shpërtheu të premten, dogji pyllin e vetëm me pisha në ishullin e njohur turistik, që ndodhet në jug të Athinës, transmeton Ballkani.info.

Zjarri tashmë është vënë nën kontroll, por vetëm pas një lufte të ashpër të zjarrfikësve. Duke qenë se nuk ka rrugë për në plazh, zjarrfikësit duhet të hyjnë në të nga deti, ndërsa helikopterët kanë hedhur ujë nga ajri.

Në njoftimin e shërbimit zjarrfikës grek, thuhet se të 13 personat janë shtetas grekë dhe se nesër do të dalin përpara prokurorisë. Jahti nuk u përmend në njoftimin për shtyp.

“Njerëz të pasur me më shumë para se tru”

Shkaku i zjarrit ka ngjallur zemërim në Greqi, e cila tashmë ka luftuar disa zjarre dhe është nën kontrollin e valës së parë të të nxehtit të vitit.

“Ne jemi të indinjuar që disa njerëz hedhin fishekzjarre në mënyrë kaq të papërgjegjshme në pyllin me pisha”, tha kryetari i bashkisë së Hidrës, Giorgos Koukoudakis për televizionin grek ERT. Ai shtoi se qyteti do të kërkojë veprime ligjore kundër pasagjerëve të jahtit.

Dënime ka pasur edhe në rrjetet sociale. “Njerëz të pasur me më shumë para se tru”, ka shkruar një person.

Greqia ka qenë në gatishmëri të lartë për zjarret në pyje që nga e marta, me autoritetet që po përgatiten për një verë të vështirë, ndërsa kushtet e thata, erërat e forta dhe temperaturat e larta vazhdojnë.

Një zjarrfikës vullnetar ka ndërruar jetë ditën e djeshme

Ditën e djeshme një zjarrfikës vullnetar 55-vjeçar humbi jetën nga plagët e marra gjatë shuarjes së zjarrit në gadishullin e Peloponezit.

Zjarret e verës janë të zakonshme në Greqi dhe shkencëtarët kanë lidhur frekuencën dhe intensitetin në rritje të ngjarjeve ekstreme të motit, duke përfshirë valët e të nxehtit, me ndryshimet klimatike.

Por vendi ka gjithashtu një problem me zjarrvënësit – të paktën 79 persona u arrestuan në gusht të vitit të kaluar për zjarre vdekjeprurëse.

Në fillim të këtij viti, Greqia miratoi ligje më të rrepta për zjarrvënien, dhe autorët tani përballen me 20 vjet burg dhe gjoba deri në 200,000 euro. /Ballkani.info/