Sot është shënuar 70-vjetori i lindjes së komandantit të Ushtrisë Çlirimtare të Kosovës, Ejup Gashi, një figurë e njohur e luftës për çlirimin e vendit.
I njohur me nofkën “Mala”, ai vlerësohet si një ndër komandantët besnikë të UÇK-së, i cili në periudha të vështira për vendin iu përgjigj thirrjes për luftë të armatosur, duke dhënë kontribut të rëndësishëm në zonat e Llapit dhe Karadakut. Sipas bashkëluftëtarëve dhe njohësve të historisë së luftës, Gashi nuk ishte vetëm pjesë e zhvillimeve historike, por një nga ata që ndikuan drejtpërdrejt në rrjedhën e tyre, përmes angazhimit, guximit dhe përkushtimit për liri.
Në përvjetorin e tij të 70-të, theksohet se jeta dhe veprimtaria e tij përfaqësojnë dekada qëndrese, përgjegjësie dhe kontributi kombëtar. Figura të tilla, sipas vlerësimeve të bashkëluftëtarëve, mbeten pjesë e kujtesës kolektive dhe krenarisë së luftës çlirimtare të Kosovës.
Me këtë rast, urime publike ka përcjellë edhe ish-zëdhënësi i Zonës Operative të Karadakut të UÇK-së, Ismet Sylejmani, i cili ka shprehur respekt dhe mirënjohje për kontributin e Komandant Malës në të mirë të atdheut dhe pavarësisë së Kosovës.
Përvjetori i tij u shënua me mesazhe urimi dhe vlerësimi për rolin e tij në historinë e re të Kosovës.







