Haradinaj përkujton 10 anëtarët e familjes Rama në Obiliq- Liria erdhi nga gjaku i tyre!
Kryetari i AAK-së Ramush Haradinaj, ka kujtuar dhjetë anëtarët e familjes Rama nga Obiliqi që u vranë 22 vite më parë nga forcat serbe.
Haradinaj ka kujtuar po ashtu edhe 180 martirë të lirisë që ranë në Fushë-Kosovë.
“Duke ndjerë dhembje të madhe, njëkohësisht jemi krenarë që sot kemi Ushtrinë që është e gatshme të ballafaqohet me secilin agresor, e të mos e lejojë asnjëherë të përsëritet historia jonë e përgjakshme” shkruan Haradinaj në Facebook.
Postimi i plotë:
Liria erdhi nga gjaku i tyre!
Në fundin e marsit 1999, aparati gjenocidal serb, ishte mobilizuar në tërë vendin, duke u hakmarrë ndaj popullatës së paarmatosur.
Kujtojmë sot martirizimin e dhjetë antarëve të familjes Rama në Obiliq.
Ne ditën e tyre përkujtimore, kujtojmë po ashtu, mbi 180 martirë të lirisë nga Fushë Kosova.
Në këtë datë të kobshme, egërsia barbare u shpërfaq edhe në lagjen Dardania dhe në tërë qytetin e Pejës.
Ndërkohë, makineria vrastare, në Malet e Berishës bombardoi zërin e Ushtrisë Çlirimtare të Kosovës, radiostacionin “Kosova e Lirë”, me ç’rast ra dëshmor Elbasan Berisha.
Duke ndjerë dhembje të madhe, njëkohësisht jemi krenarë që sot kemi Ushtrinë që është e gatshme të ballafaqohet me secilin agresor, e të mos e lejojë asnjëherë të përsëritet historia jonë e përgjakshme.
Përgjithmonë të përulur para sakrificës së të rënëve për liri!
RH
(fotografitë janë nga arkivi)