Haradinaj arrin në Berlin, pritje madhështore nga garda gjermane (VIDEO/FOTO)
Kryeministri i Kosovës, Ramush Haradinaj, i ftuar nga kancelarja gjermane Angela Merkel, sapo ka arritur në Berlin.
Haradinaj gjatë kësaj vizite do të ketë takim bilateral me kancelaren Angela Merkel, Kryetarin e Bundestagut Wolfgang Schauble, si dhe me deputetët e Grupit Parlamentar për Evropën Juglindore të Bundestagut, Dr. Johann Wadephul Christian Schmidt, Nikolas Löbel, Manuel Sarrazin dhe Hans Peter Bartels, do të marrë pjesë në konferencën “Takimet ndërkombëtare” dhe do të jetë pjesë e lutjeve të mëngjesit në Berlin.
Ballkani.info ka siguruar fotografi dhe video ekskluzive nga momenti i arritjes së kryeministrit Haradinaj në Berlin. Ai aty është pritur nga garda ceremoniale e Gjermanisë.
Në anën tjetër, Haradinaj, duke vlerësuar shumë të rëndësishme vizitën dhe takimin me kancelaren Merkel, ka thënë ha se Gjermania ka pasur dhe ka një rol të jashtëzakonshëm në proceset jetike të shtetndërtimit të Kosovës dhe gjithashtu ka theksuar se Kosova është e interesuar dhe e përkushtuar për paqe dhe stabilitet në rajon dhe më gjerë, gjithmonë duke respektuar vetveten dhe vlerat e përbashkëta euro-atlantike, duke ruajtur integritetin territorial dhe partneritetin me aleatët e përhershëm të saj.
Gjatë këtyre takimeve, Haradinaj thuhet se do të kërkojë mbështetjen e Gjermanisë në rrugën euro-atlantike, liberalizimin e vizave, pasi që Kosova ka përmbushur të gjitha kushtet e vëna nga Bashkimi Evropian, si dhe për procesin e dialogut dhe fuqizimin e marrëdhënieve bilaterale Kosovë-Gjermani. Shteti gjerman, sipas Haradinajt, ka dhënë kontribut të rëndësishëm për Kosovën në të gjitha periudhat duke qenë mbështetës i zhvillimit ekonomik dhe forcimit të shtetësisë së Kosovës.
Haradinaj, theksoi se partneriteti strategjik ndërmjet Kosovës dhe Gjermanisë është i një rëndësie të veçantë, duke njohur rolin dhe kontributin e Gjermanisë edhe në procesin e Berlinit për vendet e Ballkanit Perëndimor.
