Hapet rast kundër Dodikut për mohim gjenocidi, eurodeputeti holandez lëvdon prokurorinë boshnjake
Eurodeputeti holandez, Thijs Reuten, i është gëzuar lajmit se Zyra e Prokurorit në Bosnje e Hercegovinë ka hapur rast kundër anëtarit serb të Presidencës boshnjake, Milorad Dodik, për mohim të gjenocidit.
“Sa herë që Milorad Dodik mohon gjenocidin e Srebrenicës, ai godet me këmbë mbi varret e 8372 viktimave, hap plagët e familjeve të tyre dhe shkel me dashje çdo perspektivë për pajtim të besueshëm”.
Duke e cilësuar si veprim të shkëlqyer vendimin për padi, Reuten tha se Dodik duhet të përballet me drejtësinë, raporton Gazeta Express.
Reuten është edhe raportues për liberalizimin e vizave për Kosovën në Parlamentin Europian.
👍🏼 Excellent action 🇧🇦 prosecutor👇🏼
— Thijs Reuten 🇪🇺🌹 (@thijsreuten) March 7, 2023
Every time Milorad Dodik denies the Srebrenica genocide, he stomps on the graves of the 8,372 victims, rips open the wounds of their families and wilfully tramples on any prospects for credible reconciliation.
Dodik must face justice. pic.twitter.com/LXP0U2ur9q
Zyra e Prokurorit të Bosnjë e Hercegovinës ka hapur rast kundër liderit serb të Bosnjës Milorad Dodik. Sipas ligjit boshnjak, zyra do të kryejë një hetim, pas së cilës ushtruesi i detyrës së prokurorit do të vendosë nëse do të ngrejë një aktakuzë, thanë zyrtarët më 6 mars.
Gjykata Ndërkombëtare Penale për ish-Jugosllavinë (ICTY) dhe autoriteti më i lartë gjyqësor i OKB-së, Gjykata Ndërkombëtare e Drejtësisë, secila njohu vrasjet nga forcat serbe të Bosnjës të komanduara nga Ratko Mlladiq në Srebrenicë në fund të luftës së Bosnjës 1992-95 si gjenocid.
Dodik në shumë raste e ka mohuar gjenocidin që kur përfaqësuesi i lartë ndërkombëtar për Bosnjën, Valentin Inzko, vendosi Ligjin për ndalimin e mohimit të gjenocidit në fund të korrikut të vitit 2021.
“Gjenocidi nuk ndodhi atje. Ne të gjithë e dimë këtë këtu në Republika Srpska”, tha Dodik në një konferencë shtypi në Banja Luka më 21 shkurt.
Të nesërmen, ambasadori i SHBA-së në Bosnje dënoi ashpër komentet e Dodik, duke i quajtur deklaratat e tilla të dënueshme, të paligjshme dhe destabilizuese.