Armend Thaqi realizoi supergol nga goditja e dënimit në minutën e 93-të për t’ia mohuar fitoren skuadrës së Dukagjinit.

Gjilani barazoi 1:1 me Dukagjinin në shtëpi në kuadër të javës së 30-të të Superligës së Kosovës në futboll.

Mërgim Pefqeli i kaloi në epërsi mysafirët në minutën e parë shtesë të pjesës së parë.

Thaqi krejt në fund të ndeshjes ia siguroi një pikë shumë të rëndësishme Gjilanit.

Gjilani e zë vendin e shtatë me 39 pikë.

Dukagjini ka dy pikë më pak dhe renditet një pozitë më poshtë.

Të dyja skuadrat po luftojnë për mbetje në elitë.

Ballkani dështon ndaj ekipit të rënë nga Superliga

Feronikeli 74 edicionin e ardhshëm do të paraqitet në Ligën e Parë të Kosovës në futboll. Nuk ka siguruar mbijetesën në Superligë. Por të hënën siguroi një pikë ndaj kampionit Ballkanit.

Skuadra nga Drenasi ka ndalur Ballkanin në barazim 3:3. Ndeshja Feronikeli 74 – Ballkani u zhvillua të hënën pasdite në stadiumin “Rexhep Rexhepi” në Drenas dhe i ka takuar javës së 30-të të elitës së futbollit kosovar.

Ballkani kaloi i pari në epërsi me golin e shënuar nga Almir Ajzeraj në minutën e shtatë. Në minutë ne 23-të, Sokol Kiqina shënoi golin e barazimit 1:1, ndërsa Ballkani ktheu sërish epërsinë në minutën e 39-të. Për 2:1 shënoi Eris Abedini.

Me rezultat 2:1, përfundoi pjesa e parë. Por Kiqina doli sërish në skenë dhe në minutën e 47-të. Ai shënoi supergol nga distanca për rezultatin 2:2.

Për 3:2 në të mirë të Ballkanit shënoi Almir Oda. Ai realizoi në minutën e 70-të. Por ekipi nga Drenasi, nuk u dorëzua. Dy minuta pa përfunduar ndeshja, Amend Kryeziu shënoi për rezultatin 3:3.

Me barazimin ndaj Feronikelit 74, Ballkani ka bërë një hap prapa në garën për titull. Ballkani tani është 12 pikë prapa lideres Dritës. Deri në fund kanë mbetur edhe gjashtë xhiro. Feronikeli 74 është i fundit me 15 pikë.