Gjermanët frustrojnë Serbinë| Bërnabiq e quan von Cramonin “eksperte për gjithçka”
Zyrtarët serbë kanë nisur njëanshëm një konflikt me zyrtarë gjermanë, në Twitter. Gjithçka nisi me një deklaratë të shefes së diplomacisë gjermane, Annalena Baerbock, që drejtpërdrejt akuzoi Serbinë për tensionimin e veriut të Kosovës.
Kryeministrja serbe, Ana Bërnabiq, po u bën roje zyrtarëve gjermanë në Twitter, për t’ua rënditur kundërakuzat. Së fundi, ajo i ka replikuar eurodeputetes gjermane, Viola von Cramon.
Bërnabiq ka provuar të ironizojë me von Cramonin, duke e quajtur atë “eksperte për gjithçka”.
“Më në fund, deklarata e shumëpritur nga Sekretarja e Përgjithshme false e Kombeve të Bashkuara, e cila gjithashtu ka marrë rolin e Kryekomandantit të KFOR-it, Ekperte e Përgjithshme për të gjitha çështjet, që nga Litiumi deri te Euro-krenaria dhe krye-mbrojtëse e sundimit të ligjit dhe të drejtave të njeriut (përjashto serbët), ka shkruar kryeministrja serbe.
Von Cramon ka rishpërndarë sot adresimin e shefes së diplomacisë, Annalena Baerbock, ku akuzon Serbinë se po nxit tensione.
Edhe von Cramon tha se është e papranueshme deklarata për rikthimin e ushtarëve serbë në territorin e Kosovës.
“Rivendosja e paqes dhe e stabilitetit në veri të Kosovës duhet të jetë prioritet. Posaçërisht sulmet ndaj EULEX-it dhe njoftimi për ushtarët e Serbisë është krejtësisht i papranueshëm. Unë pres që barrikadat e serbëve të Kosovës të largohen për t’u qetësuar situata. Përkrahje të plotë për dialogun e udhëhequr nga BE-ja”, ka shkruar Von Cramon në Twitter, transmeton Express.
Këtë shënim, eurodeputetja gjermane, që përcjell vazhdimisht zhvillimet mes Kosovës dhe Serbisë, e ka bërë mbi një reagim të kryediplomates së Gjermanisë.
“Kosova uli tensionet duke i shtyrë zgjedhjet lokale. Serbia e bëri të kundërtën me retorikën e saj së fundmi. Kërkesa për kthimin e forcave serbe në Kosovë është krejtësisht i papranueshëm. Ashtu siç janë sulmet ndaj EULEX-it”, kishte shkruar mbrëmë Baerbock.
Ndaj shefes së diplomacisë gjermane kanë reaguar kryeministrja e Serbisë, Ana Bërnabiq dhe ministri serb i Punëve të Jashtme, Ivica Daçiq.
