Drafti i Asociacionit është kalë troje, si Republika Srpska – thotë ministrja e jashtme, Donika Gërvalla. Kemi zhdukur nepotizmin. Në institucionet e Kosovës ishte bërë masakër. Me terma të tilla, foli ministrja e jashtme Donika Gërvalla në intervistën te Çim Peka. Ajo foli edhe për mundësinë e anëtarësimit në KiE – për çka tha se ‘gjasat janë 50-50’.

“Shumë kam pasur frikë se nëse nuk e marrim votën tani në KiE, mund të ndryshojë konstelacioni në BE dhe mund të marrim votën e qeverive por mund të mos i kemi deputetët në anën tjetër.

Nuk mund t’ju them a vendoset a nuk vendoset, është 50-50, sa janë të mëdha shanset që të vendoset, aq janë të mëdha që të mos vendoset”, tha Gërvalla kur u pyet për anëtarësimin në Këshillin e Evropës.

Ministrja e jashtme, thotë se Drafti i Asociacionit është një Republikë Srpska për Kosovën por më pas shprehet si më poshtë:

“Nëse Serbia e pranon pakon si të tërë, edhe ne e pranojmë. Nxjerrja e atij drafti nga pakoja, është shumë e rrezikshme. Ai draft që na e kanë paraqitur këta partnerët tanë, ka kuptim vetëm nëse Serbia de facto njeh Kosovën, përndryshe është një kalë troje njësoj si Republika Srpska si në Bosnjë, por ne jemi të gatshëm ta zbatojmë gjithë pakon nëse edhe Serbia merr përsipër gjithë zotimet e saj”, thotë ajo.