Gazetarët nga Kroacia e kanë pyetur presidentin serb Aleksandar Vuçiq se si do t’i përmirësojë marrëdhëniet me Zagrebin zyrtar, pasi që në nivel lokal po shpall koalicion me kriminelin e luftës të dënuar Vojisllav Sheshel.
Gazetarja e TV Dnevnik Nova, Marina Beshiq Gjukariq, insistoi që presidenti i Serbisë të sqarojë se në këto rrethana ai synon të përmirësojë marrëdhëniet e mira fqinjësore, transmeton Ballkani.info.
“Si do t’i ndërtoni marrëdhëniet me Kroacinë nëse do ta keni zotin Sheshel në koalicion?”, pyeti gazetarja.
“Nuk e kemi zotin Sheshel në koalicion”, është përgjigjur presidenti serb.
“Nëse do ta kesh”, theksoi gazetarja Beshiq Gjukariq.
“Por ne nuk do ta bëjmë, e kemi thënë tashmë, ju nuk keni kuptuar diçka”, tha Vuçiq.
“E kuptova që do ta bëni në nivel lokal”, tha gazetari.
“Ne nuk do të ndërtojmë marrëdhënie me Kroacinë në nivel lokal. Baçka Topola dhe Nishi nuk do të ndërtojnë marrëdhënie lokale me Kroacinë”, tha Vuçiq.
“Por nëse bashkëpunoni me një kriminel lufte në nivel lokal, si do të ndërtoni marrëdhënie”, vazhdoi gazetari.
“Ç’lidhje ka kjo me bashkëpunimin me dikë, vetëm mos më mbani ligjëratë për kriminelët e luftës”, tha Vuçiq.
Vuçiq sulmoi gjithashtu gazetarin e RTL Mario Juriq. I pyetur nëse do të tërhiqej nga posti i presidentit të vendit në rast të humbjes së zgjedhjeve, ai u përgjigj: “Për fat të mirë për ju kroat, unë do të mbetem president i vendit edhe për një kohë të gjatë”.
Ai hodhi edhe një pyetje: “Dhe pse sulmoni? Jeni nervoz… Keni arsye të jeni nervoz sepse unë do të jem president i Serbisë edhe për katër vjet”.
Ai përfundoi duke besuar në një fitore bindëse dhe më pas i tha gazetarit të RTL-së në dalje: “Do të të njoftoj gjithçka!” /Ballkani.info/







