Gara për të parin e Prizrenit: Këta janë kandidatët që hapur kanë deklaruar se do të garojnë

Edhe pse ka kohë deri në mbajtjen e zgjedhjeve lokale, saktësisht gjashtë muaj, zyrtarë të partive politike kanë nisur të deklarohen si kandidat për kryetar të komunave të caktuara.

Një prej komunave ku gara pritet të jetë tejet e ashpër është ajo e Prizrenit, që aktualisht qeveriset nga Lëvizja Vetëvendosje.

Aktualisht janë tre kandidatë të partive që hapur kanë shprehur ambicien për të garuar në zgjedhjet lokale të tetorit për kryetar të Prizrenit.

Kryetari actual i kësaj komune, Mytaher Haskuka, mbrëmë në një emision televiziv e ka lënë të hapur mundësinë që të garojë edhe një mandat.

“Nuk muj me paragjyku kurrgjë. Do të varet varësisht prej kërkesave do të shikojmë. Ka njerëz të cilët kërkojnë të kandidoj”, ka thënë Haskuka në Klan Kosova.

Haskuka, ka thënë që nuk e sheh problematike që deputetja e Lëvizjes Vetëvendosje, Drita Millaku, e ka shpallur kandidaturën për kryetare të kësaj komune.

“Një gjë është shumë e mirë që në Vetëvendosje çdo person mundet me i paraqitë aspiratat e veta edhe nuk është diçka problematike. Nuk shoh kurrgjë problematike në këtë aspekt; çdo person mund ta paraqesë kandidaturën”, ka deklaruar Haskuka.

Pra Haskuka së parti do të ketë garë brenda partisë, pasi edhe bashkëpartiakja e tij Drita Millaku ka shprehur ambiciet për t’u bërë kryetare e Prizrenit.

Nëse i jepet mundësia që ajo të jetë e zgjedhura e VV-së për Prizrenin, Millaku e ka dhënë fjalën dhe besën që do t’i shërbejë me ndershmëri të gjithë prizrenasve pa dallim rajoni, kombësie dhe feje.

“Në prag të zgjedhjeve lokale të vjeshtës para organeve të Lëvizjes dhe para aktivistëve dua të paraqes kandidaturën time për kryetare të komunës së Prizrenit. E dua Prizrenin, çdo rrugicë, çdo lagje, çdo fshat e çdo skaj të tij. Jetoj çdo ditë pranë historisë, harmonisë, kulturës e traditës së këtij qyteti historik. Nëse më jepet mundësia të garojë si kandidate e Lëvizjes e jap fjalën dhe besën se me tërë qenien time do ti përkushtohem punës për ti shërbyer me ndershmëri të gjithë qytetarëve të Prizrenit pa dallim rajoni, kombësie dhe feje”, ka shkruar ajo dje në një postim në Facebook.

Kandidat tjetër për kryetar të Prizrenit sipas të gjitha gjasave do të jetë edhe Anton Quni nga Lidhja Demokratike e Kosovës.

Ai mbrëmë në një emision televiziv e ka lënë të hapur mundësinë që të garojë për kryetar të kësaj komune.

“Nuk përjashtohet që kandidoj për kryetar të Prizrenit. Është shumë herët, duhet të përfundojmë disa procese të brendshme”, tha Quni në T7.

Edhe nënkryetari i Partisë Demokratike të Kosovës, Shaqir Totaj ka konfirmuar kandidaturën e tij për kryetar të Prizrenit.

Totaj dekalroi ditë më pare se e ka përkrahjen e shumë qytetarëve të Prizrenit dhe të degës së PDK-së në Prizren.

“Mendoj se ajo punë ka vetëm se pritet të zyrtarizohet dhe atëherë tek do të fillojmë me plane konkrete me shpalosje të programit të konceptit e kështu me radhë”, tha Totaj për mediet.

Poashtu edhe Zafir Berisha nga NISMA ka thënë se sërish do të garojë për kreun e Prizrenit.

“Sigurisht do të kandidoj sepse kam obligim moral, njerëzor e qytetar para prizrenasve, që Myten dhe këtë grumbull kalamajsh politik t’i dërgoj në shtëpi. Pasi e llogaris veten fajtor që i kam sjell në pushtet, kuptohet pa e dituar se sa hajdutë janë që po ja kalonin edhe PDK-së”, ka thënë ai për mediet ditë më pare.

Nga Aleanca për Ardhmërinë e Kosovës për disa zgjedhje lokale rresht kandidat i kësaj partie për kryetar të Prizrenit ka qenë Lulëzim Kabashi, por nuk dihet nëse i njëjti do t’ia mësyjë sërish garës.

Kujtojmë se zgjedhjet lokale mbahen në muajin tetor të këtij viti.