Edi Rama shpreson që marrëveshja e dakorduar por e pa nënshkruar të mos jetë truk i radhës ballkanik

Kryeministri i Shqipërisë Edi Rama ka reaguar pas negociatave në Ohër të Maqedonisë së Veriut, mes kryeministrit të Kosovës Albin Kurti dhe presidentit të Serbisë Aleksandër Vuçiq, të cilat zgjatën për rreth 12 orë.

Përmes një postimi në rrjetet sociale, Rama u shpreh se pati një marrëveshje, por nuk kishte nënshkrim. Ndaj, ai shpreson që kjo të mos jetë një tjetër mashtrim ballkanik.

“Le të shpresojmë që djalli të mos fshihet në detaje sonte dhe që marrëveshja e rënë dakord por e pa nënshkruar të mos jetë një tjetër mashtrim ballkanik! Përndryshe kjo do të ishte një arritje historike që do të shpallte një pranverë të shumëpritur në marrëdhëniet mes dy kombeve më të mëdha të Ballkanit’, ka shkruar Rama në Twitter.