Tashmë shumë kamionë me mallra serbe shihen duke lëvizur rrugëve të Kosovës pasi që kryeministri në largim, Albin Kurti hoqi ditë më parë taksën 100 për qind për lëndën e parë nga Serbia.
Ky vendim u kundërshtua në Kosovë, pasi që ishte marrë pa miratimin e ministrave të LDK-së në shpërputhje me kërkesën e SHBA-ve.
Vendimi i marrë më 20 mars në fakt ishte heqje e plotë e taksës ndaj Serbisë e cila do të hyjë në fuqi më 1 prill. Nga kjo datë Serbia do të fus në Kosovë mallrave e papenguar. Megjithëse Kurti ka paralajmëruar se nga 1 prilli do të fillojë zbatimi i reciprocitetit si ndaj Serbisë ashtu edhe ndaj Bosnjës dhe Hercegovinës, kjo duket zor e realizueshme, shkruan Ballkani.info.
Këtë e ka thënë edhe ish kryeministri dhe lideri i AAK-së, Ramush Haradinaj i cili e ka përmendur një tëitt të Kurtit ku i drejtohet kancelares Merkel dhe në të cilin thotë se barrierat ndaj Serbisë do të hiqen pa ndonjë kundërvlerë.

“Qeveria në largim nuk mundi të ikë pa e hequr taksën! Në pikën 1 hiqet taksa për lëndën e parë kurse në pikën 3 të vendimit obligon veten për heqje të plotë të taksës me 1 prill. Me këtë e zhvlerësoi kundërvlerën për marrëveshjen finale dhe e humbi plotësisht kreditin te partnerët ndërkombëtarë, e posaçërisht te SHBA-ja. Ashtu si e kishte fillimin e turpshëm, Qeveria në ikje gjithashtu po largohet me turp”, ka thënë Haradinaj.
Kurti gjatë fushatës zgjedhore dhe pas saj, kishte premtuar se fillimisht do të vendoset reciprociteti i plotë politik, ekonomik dhe tregtar ndaj Serbisë e më pas do të hiqet taksa. Mirëpo, kjo nuk ka ndodhur, faktikisht ka ndodhur krejtësisht ndryshe dhe pa pajtimin e LDK-së.

Në fillim ai pati dalur në një konferencë të jashtëzakonshme për media me disa prodhues, duke thënë se taksa do të hiqet për lëndën e parë nga 15 marsi, e më pas në mënyrë të përshkallëzuar do të hiqet plotësisht. Kjo, sipas tij, pasi që Serbia të ndalë fushatën kundër Kosovës.
Për këtë paraqitje të befasishme të Kurtit, LDK-ja dhe ministrant e saj e kishin kuptuar nga mediat. Ky nuk ishte as vendim i qeverisë, pasi nuk ishte votuar fare aty.
Këtë gjest të mirë të Kurtit ndaj Serbisë s’e mbështeti as SHBA-ja, ku ambasadori Richard Grenelli tha se është e pamjaftueshme si masë. Grenell as vendimin e fundit për heqjen e taksës për lëndën e parë nuk e ka miratuar.
Dhe Serbia e kompanitë e saja të cilat në Kosovë për një vit kanë sjellë mallrave në vlerë deri në 500 milionë euro, janë në pritje që nga 1 prilli (e mërkurë) ta ‘pushtojnë’ sërish tregun kosovar.
Rihapja e tregut për Serbinë pas asnjë përfitim ekonomik dhe politik për Kosovën do t’i dëmtojë edhe prodhuesit vendorë. Prodhuesit kosovarë me vendosjen e taksës ndaj Serbisë kanë përfituar maksimalisht, duke e rritur prodhimin, numrin e të punësuarve dhe eksportin.
Se Serbia mezi nuk ka pritur t’i hapet porta e Kosovës, tregojnë edhe statistikat e hyrjes së kamionëve në vendin tonë që nga 20 marsi kur u hoq tarifa për lëndën e parë.
Pas vendimit të Qeverisë së Kosovës për të hequr tarifën prej 100 për qind për lëndën e parë për produktet nga Serbia dhe Bosnja e Hercegovina, në pikën doganore në Merdare, kanë hyrë rreth 150 kamionë me të produkte të lëndës së parë nga këto dy shtete.
Në këtë pikë doganore, bëhet e ditur se që nga momenti kur ka hyrë në fuqi ky vendim, nga 20 mars e deri më 29 mars, kanë hyrë 146 kamionë me mallra te lëndës së parë. /Ballkani.info/







