Nëse Lidhja Demokratike e Kosovës dhe Lëvizja Vetëvendosje, arrijnë t’i bëjnë 61 vota le ta rrëzojnë Qeverinë, Aleanca për Ardhmërinë e Kosovës është e gatshme që të shkojë në zgjedhje.

Kështu ka deklaruar deputeti i kësaj partie Blerim Kuçi, i cili thotë se detyrë e opozitës është të ngris mocion atëherë kur i kanë votat.

Deputeti Kuçi vlerëson se AAK ka shënuar rritje të madhe. Ai thotë se në të gjitha sondazhet që janë bërë kjo parti dhe lideri i saj kanë dal në vendin e parë.

Ai tha se nuk i kërkojnë zgjedhjet pasi kryeministri Haradinaj ka ende shumë punë për të bërë, por që potencon se AAK-ja ka shënuar rritje të jashtëzakonshme.

Deputeti i AAK-së Blerim Kuçi, ka folur edhe për funksionimin e koalicionit qeverisës, për të cilin thotë se ani pse duket që ka probleme është duke funksionuar në mënyrën më të mirë të mundshme.

Ai tha se kjo Qeveri ka përfunduar krijimin e Ushtrisë së Kosovës, ligjin për pagat,ligji për kryeqytetin.

Për propozimin e kryetarit të Kuvendit, Kadri Veseli që të formohet një komision parlamentar për pastrimin e listave të veteranëve, Kuçi tha se AAK është për çdo gjë që e dërgon përpara shoqërinë, por jo kur bëhen ato për përfitimin e partive politike.

Viti 2019 është shpallur si vit i ekonomisë nga Qeveria e Kosovës, megjithatë vendi vazhdon të shënojë rritje të ulët ekonomike, mirëpo deputeti Kuçi thotë se Qeveria Haradinaj ka krijuar një mori lehtësirash për bizneset e rezultatet e të cilave do të shihen në vitet në vijim.

Sipas tij, krijimi i disa zonave ekonomike, si ajo amerikane në Gjakovë, është një shtytje që investitorët e huaj të vijnë dhe të investojnë në Kosovë.