Dikur ishte vatër e infeksionit, kjo komunë e Kosovës sot nuk shënoi asnjë rast me COVID-19
Të gjitha mostrat e testuara për koronavirus gjatë 24 orëve të fundit në Komunën e Malishevës kanë rezultuar negative. Kjo është konfirmuar në komunikimin zyrtar të IKSHPK-së me Komunën e Malishevës.
Numri i personave aktiv me COVID-19 në Malishevë është 12. Rezultatet e sotme, në emër të shtabit komunal për menaxhimin e situatës me COVID-19, i ka konfirmuar nënkryetari i Komunës së Malishevës, Hajdin Berisha.
Sipas Berishës, gjendja në Komunën e Malishevës, është stabile dhe nën kontroll, ndërsa shtabi komunal është në monitorim të vazhdueshëm të situatës, si dhe duke ofruar mbështetjen e plotë për të gjithë ata që në një formë apo tjetër, janë të prekur nga pandemia, si në rastet e prekura, ashtu edhe në rastet tjera.
“Në emër të shtabit emergjent komunal për menaxhimin e situatës me COVID-19 në Komunën e Malishevës, kërkojmë nga të gjithë qytetarët e Komunës së Malishevës, që të vazhdojnë të respektojnë masat mbrojtëse në raport me pandeminë COVID-19, të mbani maska mbrojtëse, të mbani distancën, të pastroni duart dhe në maksimum të mos frekuentoni vendet me grumbuj të njerëzve, pasi kjo është arma dhe mënyra e vetme e mbrojtjes nga kjo pandemi”, ka thënë Berisha.
