Deputeti Haxhiu: Kërkesa e qytetarëve për tërheqje nga Trusti u la me qëllim për vjeshtë
Deputeti i PDK-së, Bekim Haxhiu, ka qenë i ftuar në emisionin “Frontal” të t7, ku ka folur për projektligjin për tërheqjen e një përqindje nga Trusti.
Ai tha që qe 22 ditë i kanë dërguar nënshkrimet në KQZ për verifikim, mirëpo deri tani nuk kanë pranuar.
Sipas tij, “kërkesa e qytetarëve” për tërheqjen e Trustit është lënë me qëllim për sesionin vjeshtor.
“Qytetarët kanë mbledhur nënshkrime të cilat janë deponuar më 15 korrik në Kuvend. Projektligji parasheh që të bëhet tërheqja e mjeteve nga 10 deri në 30 për qind. Sipas ligjit për nisma legjislative, kuvendi këto nënshkrime i dërgon në KQZ dhe brenda 15 ditëve duhet të bëhet verifikimi i tyre. Sot jemi në ditën e 22-të prej që janë dorëzuar nënshkrime dhe nuk ka konfirmim nga KQZ. Ka ndodhur një shtyrje e kërkesës së qytetarëve qëllimisht që të mbetet për sesionin vjeshtor, pra që të shtyhen afatet sa më shumë”, tha Haxhiu.
