Serbi

Delegacioni i Kosovës të mërkurën do e vizitojë lokacionin e varrezës masive në Kizhevak

Të mërkurën e ardhshme një delegacion i Kosovës, do të vizitojë punimet në lokacionin e varrezës masive në Kizhevak të Serbisë. Kushtrim Gara nga komisioni qeveritar, ka thënë se punimet do të vazhdojnë deri të dihet se janë kryet të gjitha punimet dhe aty nuk ka mbetje mortore.

Në këtë lokacion ditën e djeshme janë gjetur mbetje mortore, kurse punimet kanë vazhduar edhe sot. Në Kizhevak afër Rashkës në Serbi janë gjetur mbetje mortore, të cilat mendohen se janë të shqiptarëve të Kosovës.

Kryetari i Delegacionit të Kosovës, Ibrahim Makolli dhe ai i delegacionit të Serbisë Veljko Odaloviç kanë monitoruar nga afër gërmimet në këtë pjesë.

“Përderisa kemi edhe mbi 1600 persona të zhdukur, natyrisht se nevojitet edhe një angazhim i pandalshëm që të zbardhet fati i personave te zhdukur”, ka deklaruar Ibrahim Makolli, kryetar i Delegacionit të Kosovës.

Makolli tha se hulumtimi i përbashkët ka konfirmuar se janë edhe dy vendndodhje të varrezave masive të mundshme në Serbi, afër Novi Pazarit dhe Sjenicës. Kreu i delegacionit të Beogradit, Velko Odalloviç, tha se ai nuk mund të deklarojë asgjë me siguri për numrin e trupave në Kizhevak.