Ish-deputeti nga radhët e Lëvizjes Vetëvendosje, Afrim Kasolli, duke komentuar deklaratën e të Dërguarit Special të Gjermanisë për Ballkanin Perëndimor, Manuel Sarrazin, sa i përket qasjes së kryeministrit Albin Kurti në raport me dialogun me Serbinë, ka thënë se kjo është një dëshmi e çarjes diplomatike e Kosovës me shtetin gjerman.
Sarrazin, në një intervistë për mediat në Shqipëri, të shtunën tha se rruga që po ndjek Kurti në dialog, “mund të mos jetë në interes të Kosovës.
“Një dëshmi kjo e çarjes së raporteve diplomatike të Qeverisë së Kosovës edhe me mbështetësin e tij kryesor te deritanishëm, Gjermaninë. Ndërkohë, ka ditë që zyrtare të lartë të administratës amerikane, sikur J.O’Brein, G.Escobar e deri te ambasadori amerikan në Prishtinë, kanë pohuar se Qeveria e Kosovës nuk po e trajton si partnere ShBA-në”, shkroi Kasolli në Facebook.
Për analistin politik, ky pozicion defansiv i Kosovës tregon “për dështimin e synimeve të dikurshme të Kurtit se do t’i shfrytëzonte antagonizmat e Berlinit dhe Uashingtonit për të t’u lidhur me të parin nëse e humb mbështetjen e të dytit, ashtu siç kishte ndodhur gjatë kohë së administratës së Donald Trump”.
“Ne ketë situate ku Amerika po e kritikon se nuk po i trajton si partner, kurse Gjermania se rrugën qe është duke ndjekur nuk e afron Kosovën me BE-në, mbase e vetmja mundësi qe i ka mbetur Kurtit është ndihma e tij për socialistët evropianë për zgjedhjet e 9 qershorit 2024, për Parlamentin Evropian”, shtoi ai.
Mbase kështu, shtoi Kasolli, shpreson se do të mund ta ndryshojë elektoralisht Evropën dhe kur të “fitojnë aleatet e tij të njëmendtë politike dhe ideologjikë do te përmirësohet edhe pozicioni ndërkombëtar i Kosovës”.
Ndryshe, Sarrazin të shtunën ka thënë se rruga nëpër të cilën po ecën qeveria e Albin Kurtit në planin afatgjatë, “kam frikë se kjo mund të mos jetë e mirë në interesin e Kosovës, për afrimin me Bashkimin Evropian”.
Këto komente, i Dërguari Special i Gjermanisë për Ballkanin Perëndimor i ka bërë në një intervistë për “ABCnews Albania”, duke folur për dialogun mes Kosovës dhe Serbisë, të ndërmjetësuar nga Bashkimi Evropian, dhe qasjen që kreu i ekzekutivit kosovar e ka në këtë proces.
“Kam frikë se kjo mund të çojë në një drejtim të mbështetjes tek vetja dhe humbjes së mundësive për të shkuar drejt BE-së”, deklaroi Sarrazin.
Deklaratat e diplomatit gjerman vijnë në një kohë kur vendimi i Bankës Qendrore të Kosovës (BQK), për ndalimin e dinarit serb për pagesa në territorin e Kosovës, kanë shkaktuar fërkimin e radhës në mes të ekzekutivit kosovar dhe bashkësisë ndërkombëtare.
Vendet perëndimore, përfshirë Shtetet e Bashkuara të Amerikës dhe BE-në, kanë kritikuar qeverinë e Kurtit për, siç kanë thënë ata, moskoordinimin me ta lidhur me çështjen e dinarit serb.
Madje, SHBA-të kanë theksuar se ky vendim ka afektuar raportet në mes të dy vendeve respektive.
Ndërkombëtarët janë duke kërkuar që për çështjen e dinarit duhet të dialogohet në Bruksel.
Në këtë drejtim u thirr një takim nga ndërmjetësi i BE-së për dialogun Kosovë-Serbi, Miroslav Lajçak, në të cilin, Kosova refuzoi që të dërgojë përfaqësues politikë, në vend të tyre shkuan në kryeqendrën evropiane përfaqësues të BQK-së.
Për dallim nga Kosova, delegacioni serb kishte përfaqësues politik, i kryesuar nga drejtori i të ashtuquajturës “Zyrë për Kosovë” në Qeverinë e Serbisë, Petar Petkoviç.
Në këtë takim nuk u arrit ndonjë rezultat.
VIDEO BONUS: Për dy muaj 116 mijë kërkesa për pasaporta – Rritet interesimi edhe i qytetarëve në veri







