Deputeti i Aleanca për Ardhmërinë e Kosovës, Daut Haradinaj, ka reaguar ndaj deklaratës së ministrit për Komunitete dhe Kthim, Nenad Rashiq, lidhur me çështjen e 24 hektarëve tokë për Manastiri i Deçanit.

Haradinaj ka thënë se nëse kryeministri Albin Kurti nuk e demanton deklaratën e Rashiqit, atëherë sipas tij bëhet fjalë për një çështje shumë të rëndë, transmeton Ballkani.info.

“Nëse Kurti nuk e demanton, kjo përbën më shumë se tradhti kombëtare”, ka shkruar Haradinaj.

Reagimi i tij vjen pasi ministri Rashiq deklaroi se Kurti i kishte thënë se, falë tij, ishte marrë vendimi për t’ia transferuar 24 hektarë tokë Manastirit të Deçanit.

Deklarata ka nxitur reagime të shumta në skenën politike në Kosovë, ku përfaqësues të opozitës kanë kërkuar sqarime nga kryeministri lidhur me këtë çështje. /Ballkani.info/