Beyonce

Beyonce feston publikimin e albumit të ri me një set fotografik ‘topless’

Kanë kaluar gjashtë vjet që kur Beyonce publikoi albumin e saj të fundit “Lemonade”, pas të cilit ajo vendosi të bënte një pushim të merituar pas më shumë se dy dekadash.

Mirëpo, pritjes së gjatë i erdhi fundi mëngjesin e së shtunës, kur Beyonce publikoi albumin e saj të shtatë “Renaissance”, me një foto dhe një deklaratë që nuk lë askënd indiferent.

Në foton e parë shihet diva duke pozuar topless, e ulur në një lloj froni, ndërsa në të dytën deklarata e mëposhtme.

“Pra, albumi është publikuar dhe ju të gjithë prisnit deri në kohën e duhur të publikimit, në mënyrë që të gjithë të shijoni së bashku”, shkroi Beyonce.

“Nuk kam parë kurrë diçka të tillë. Nuk mund t’ju falënderoj mjaftueshëm për dashurinë dhe mbështetjen”.

“Faleminderit për mbështetjen e palëkundur, faleminderit për durimin”.

“Ne do të marrim kohën tonë dhe do ta shijojmë muzikën”.

“Do të vazhdoj të jap gjithçka dhe do të bëj më të mirën për t’ju dhënë të gjithëve lumturi”, tha në fund mbretëresha e popit.

Çfarë përfshin albumi i Beyonce dhe sa këngë janë?

Në këtë album të ri, i realizuar gjatë pandemisë, artistja ka dashur të eksplorojë tingullin e saj në një mënyrë krejtësisht të hapur dhe eksperimentale, pa e humbur thelbin e saj.

Megjithatë, në të ka një atmosferë të viteve 1980 që është e vështirë të injorohet.

“Synimi im ishte të krijoja një vend të sigurt, një vend pa gjykim”, tha ajo gjatë pandemisë.

“Një vend për të qenë i lirë nga perfeksionizmi dhe mendimi i tepërt. Një vend për të bërtitur, çliruar, ndjerë lirinë”.

Albumi përmban gjithashtu bashkëpunime me artistë të tjerë si: Beam dhe Grace Jones dhe Tems, si dhe referenca për zëra të tjerë të mëdhenj si Giorgio Moroder dhe Nile Rodgers dhe Drake. /Telegrafi