Autori i krimit në Gllogjan ende i panjohur, Qeveria shpërblen me 20 mijë euro atë që ndihmon në kapjen e tij

Mbrëmjen e së premtes, një person i maskuar ka gjuajtur me kallashnikov në drejtim të një autobusi, që si pasojë la të vdekur tre persona, shoferin e autobusit, Gani Gjokaj dhe dy nxënës të shkollës së mesme, Genta Mustafaj dhe Ledion Hamzaj.

Për gjetjen e përgjegjësit që ka kryer këtë vrasje të trefishtë, institucionet e sigurisë dhe drejtësisë kanë thënë që janë mobilizuar, mirëpo edhe pas 60 orëve asnjë i dyshuar nuk është kapur.

Ndërsa Qeveria e Kosovës ka marrë një hap tjetër në lidhje me zbulimin e vrasësit. Dje ajo ka marrë vendim që kushdo që ndihmon në kapjen e autorit, do të shpërblehet me 20 mijë euro.

Ndërsa, kryeministri Kurti, mbrëmë është takuar me drejtorin e Policisë, Samedin Mehmeti. Pas këtij takimi, Kurti ka thënë se sasia e informacionit po rritet por ende nuk kanë zgjidhje

“Mësova që i kanë shtuar përpjekjet, po rritet sasia e informacionit, mirëpo ende nuk e kemi zgjidhjen. Kur jemi në prag të 48 orësh, fatkeqësisht ende nuk e kemi zgjidhjen, por nuk po mungon angazhimi. Janë shtuar numri i zyrtarëve të cilët po merren me hetimin dhe hulumtimet, në mënyrë që i gjithë populli i Kosovës, e në veçanti familjet dhe të afërmit të prehen të qetë duke e sjellë para drejtësisë vrasësin apo vrasësit”, tha Kurti.

Ndërkaq, edhe Prokuroria e Shtetit ka kërkuar ndihmën e qytetarëve të Kosovës, që për çfarëdo informacioni kanë në lidhje me autorin e krimit t’i informojnë organet e drejtësisë.