Asnjë zyrtarë serbë s’merr pjesë në shënimin e përvjetorit të gjenocidit në Srebrenicë, mediat e Vuçiqit vajtojnë ‘sulmin’ ndaj tij
Qendra Përkujtimore Srebrenicë-Potoçari shënon sot 27 vjetorin e gjenocidit serb kundër boshnjakëve të kryer në korrik 1995.
Në shënimin e këtij krimi, më të madhit në Evropë që nga përfundimi i Luftë së Dytë Botërore, nuk ka marrë pjesë asnjë nga zyrtarët serbë.
Mediat serbe shumë pak i kanë dhënë hapësirë shënimit të kësaj ngjarje, duke u marrë kryesisht me sulmin e para shtatë vjetësh ndaj kryeministrit të atëhershëm të Serbisë, Aleksandar Vuçiq.
Presidenti aktual serb aso kohe kishte shkuar për të nderuar viktimat e Srebrenicës, por pa kërkuar falje për gjenocidin e kryer nga Serbia, por as ai vet nuk kishte kërkuar falje për deklaratën e bërë në vitin 1995 në Kuvendin e Serbisë ku kishte thënë nëse një serb vritet, ata do t’i vrasin 100 myslimanë boshnjakë.
Serbët sulmin me gurë dhe shishe ndaj Vuçiqit edhe sot e quajnë antenat, gjë që ishte vetëm frustrim i nënave dhe grave që kishin humbur më të dashurit e tyre nga masakra e Srebrenicës.
Varrosen 50 viktima të Srebrenicës, 27 vjet pas gjenocidit
Eshtrat e 50 viktimave të gjenocidit në Srebrenicë, të identifikuara së voni, u varrosën të hënën në Qendrën Përkujtimore Potoçari – aty ku ndodhen varret e mbi 6,670 viktimave të tjera.
Më 11 korrik, në Bosnje e Hercegovinë shënohet 27-vjetori i masakrës, në të cilën forcat serbe vranë mbi 8,000 burra dhe djem myslimanë, gjatë luftës së viteve ’90.
Masakra është cilësuar si mizoria më e rëndë në Evropë që prej përfundimit të Luftës së Dytë Botërore, ndërsa Gjykata Ndërkombëtare e Hagës e ka njohur si gjenocid.
Në Potoçari, ceremonitë përkujtimore të masakrës i ndoqën mijëra veta.
Hamdija Fejziq, kryetar i Komitetit Organizativ për Përkujtimin e Përvjetorit të Gjenocidit dhe nënkryetar i Komunës së Srebrenicës, tha se ishte me fat që i mbijetoi gjenocidit.
Fejziq tha se ngjarja e tmerrshme nuk duhet të bëhet kurrë “vetëm një fusnotë në historinë e njerëzimit”.
Ai u bëri thirrje zyrtarëve në Bosnje e Hercegovinë që të ndërmarrin hapa konkretë për ta bërë Srebrenicën “një qytet jete, e jo vdekjeje”.
“Në Srebrenicë, fëmijët e lindur pas gjenocidit, rriten dhe ata janë shpresa jonë”, tha Fejziq.
Michael Murphy, ambasador i SHBA-së në Sarajevë, tha se vrasjet në Srebrenicë janë “një ngjarje e errët në histori, jo vetëm për [Bosnje e Hercegovinën], por për gjithë njerëzimin”.
Më 11 korrik të vitit 1995, forcat serbe të Bosnjës kanë hyrë në Srebrenicë – zonën e shpallur të sigurt nga Kombet e Bashkuara.
Në ditët që kanë pasuar, ato kanë vrarë mbi 8,000 burra dhe djem myslimanë, ndërsa trupat e tyre i kanë hedhur në gropa në pyjet përreth.
Vrasjet kanë ndodhur për pak ditë, por procesi i gjetjes së trupave ka marrë vite dhe identifikimi dhe varrimi i eshtrave vazhdojnë ende.
Deri më tani, 47 persona janë dënuar me më shumë se 700 vjet burgim për rolet e tyre në gjenocid.
Ish-udhëheqësi i serbëve të Bosnjës, Radovan Karaxhiq, është dënuar me burgim të përjetshëm, ashtu si edhe ish-udhëheqësi ushtarak në Bosnje, Ratko Mlladiq. /Ballkani.info/