Albulena Haxhiu në kujtim të Astrit Deharit: Ne do të vazhdojmë rrugën të cilën ty ta ndalën në gjysmë

Deputetja e Lëvizjes Vetëvendosje, Albulena Haxhiu, ka kujtuar ish aktivistin e kësaj lëvizjeje Astrit Dehari.

“Ishim në mbledhje të Këshillit të Përgjithshëm, diku në përfundim të saj, kur vërejta që diçka nuk po shkonte. Sapo dola nga ai ambient, dikush nga aktivistët më njoftoi për Astritin, ndonëse nuk kishim informacione të sakta nëse Astriti ka vdekur ose po lufton për jetën që e donte aq shumë. Më vonë kuptuam që Astriti vdiq dhunshëm në Qendrën e paraburgimit në Prizren, që u mbajt padrejtësisht dhe politikisht”, ka shkruar Haxhiu në Facebook.

“Sikur sot kujtoj dhimbjen shpirtërore që përjetuam, dhimbje kjo që na përcjellë edhe sot sepse humbëm një aktivist të jashtëzakonshëm dhe sepse ende sot nuk ka drejtësi për Astritin”.

“Astrit, ne ishim krenarë që patëm një shok sikur ti. Ne do të vazhdojmë rrugën të cilën ty ta ndalën në gjysmë. Do të jesh përherë në mendjet dhe zemrat tona” ka shkruar Haxhiu.

Nesër bëhen dy vjet nga vdekja e Astrit Deharit.