Albin Kurti ankohet në FMN: Qeveria Hoti po bën parregullsi me Trustin Pensional
Lideri i Vetëvendosjes, Albin Kurti është ankuar në Fondin Monetar Ndërkombëtar në lidhje me situatën e fundit që po ndodhë në Trustin Pensional.
Duke mos pasur ku të shprehet në Kuvendin e Kosovës, Kurti ka zgjedhur që gjatë një bisede virtuale me ekipin e Fondit Monetar Ndërkombëtar të ankohet në lidhje me tërheqjen e 10% nga Trusti Pensional.
Përmes një njoftimi në Facebook, Lëvizja Vetëvendosje ka shkruar se në këtë takim virtual, kryetari i partisë e ka njoftuar FMN’në për problemet e pakos për rimëkëmbje ekonomike të qeverisë Hoti.
Tutje, Kurti e ka quajtur para zyrtarëve të FMN’së Qeverinë Hoti, si Qeveri jolegjitime.
Njoftimi i plotë:
Kryetari i Lëvizjes VETËVENDOSJE!, Albin Kurti bashkë me nënkryetarin, Besnik Bislimi dje u takuan virtualisht me ekipin e Fondit Monetar Ndërkombëtar (FMN), të kryesuar nga z. Gabriel Di Bella dhe znj. Stephanie Eble. Takimi është pjesë e takimeve të rregullta të misionit të FMN-së.
Në takim u shkëmbyen informata mbi zhvillimet e deritanishme me menaxhimin e pandemisë në Kosovë si dhe implikimet e saj si për ekonominë e vendit ashtu edhe për shëndetin e financave publike ne Kosovë. Z. Kurti e njoftoi misionin e FMN-së me qëndrimet e Lëvizjes VETËVENDOSJE! për disa momente me rëndësi të ndërlidhura me mënyrën se si po menaxhohet ekonomia dhe shëndetësia e vendit në kohën e pandemisë. U fol edhe për problemet që sipas Lëvizjes sonë përcjellin pakon e rimëkëmbjes ekonomike të përgatitur nga Qeveria jolegjitime, të cilat edhe po e pamundësojnë kalimin e saj në kuvend. Sidomos u veçuan parregullsitë e shumta që e shoqërojnë trajtimin që i bën qeveria jolegjitime trustit pensional të vendit si dhe të hyrave të grumbulluara nga procesi i privatizimit.
