Disa ditë pasi Kryeparlamentari Glauk Konjufca lavdëroi Prokurorinë Speciale për aktakuzën lidhur me sulmin terrorist në Banjskë, duke thënë se kanë goditur në shenjë, deputeti i Lëvizjes Vetëvendosje, Artan Abrashi, ka thënë se aktakuza nuk është përgatitur nga Kryeprokurori i Speciales, Blerim Isufaj, por se me siguri kanë ndihmuar shtetet partnere.
Reagimin e ka bërë pasi kjo prokurori ka intervistuar dje Koordinatoren e Komiteteve në Lëvizjen Vetëvendosje, Dejona Mihalin, gjë për të cilën ai goditi Isufajn.
Aktakuzën për Banjskën, Abrashi e ka quajtur “super të vonuar”.
“A e ka bë Prokuroria Speciale një aktakuzë SUPER TË VONUAR ndaj aktit terrorist në Banjskë, të kryesuar nga Radojçiqi? Tash, Blerim Isufaj, i cili nuk është emëru Kryeprokuror, thotë kështu: po e bëjmë edhe ne një aktakuzë të madhe (të cilën me siguri se ka bë vetë, por i kanë ndihmu shtetet tona partnere), mirëpo 5 muaj para zgjedhjeve e fton në Prokurori, Dejona Mihalin”, ka shkruar Abrashi.







