Kreu i LDK-së, Lumir Abdixhiku, mblodhi sot kryetarët e degëve të partisë, për të diskutuar mbi zgjedhjet lokale të 12 tetorit.

Përmes një postimi në Facebook, Abdixhiku theksoi se fushata e kandidatëve të LDK-së do të jetë e ndershme dhe plot shpresë.

“Kandidatët tanë janë njerëzit e punës, të përgjegjësisë, të shpresës. Ata do të jenë kudo pranë jush, sepse ky është misioni ynë: të shërbejmë, të rikthejmë besimin, të kthejmë Kosovën në rrugën e zhvillimit”, shkroi ai.

Ky është njoftimi i plotë i Abdixhikut:

U mblodhëm sot me Kryetarët e Degëve për të nisur betejën tonë të madhe, zgjedhjet lokale.

Nga hapja e fushatës më 13 shtator në Prishtinë, deri tek dita e fitores më 12 tetor, Lidhja Demokratike e Kosovës është gati! Gati të hyjë në çdo lagje, çdo fshat e çdo qytet. Gati të flasë me secilin qytetar, të dëgjojë çdo shqetësim, e të bëjë të ardhmen që meriton ky vend.

Fushata jonë do të jetë e ndershme dhe plot shpresë.

Kandidatët tanë janë njerëzit e punës, të përgjegjësisë, të shpresës. Ata do të jenë kudo pranë jush, sepse ky është misioni ynë: të shërbejmë, të rikthejmë besimin, të kthejmë Kosovën në rrugën e zhvillimit.

Le t’i japim fund papërgjegjësisë. Le t’i japim vendit tonë shpresën që meriton. Le ta kthejmë LDK-në aty ku e ka vendin – forcë udhëheqëse e shtetit.

Zoti na bekoftë!

Zoti e bekoftë Republikën tonë!