AAK fuqizohet në Drenicë, Naim Bazaj bashkë me 300 persona i bashkohen sot partisë së Haradinajt
Kosova pritet që shumë shpejt ta mësojë datën e zgjedhjeve të jashtëzakonshme parlamentare. Kjo pasi që ditë më parë dha dorëheqje kryeministri Ramush Haradinaj si pasojë e thirrjes për t’u paraqitur në Gjykatën Speciale.
Partitë tashmë kanë filluar mobilizim që të jetë të përgatitura për fushatë në momentin që zyrtarisht caktohet data e zgjedhjeve.
Në vazhdën e këtij mobilizimi hyjnë edhe aderimet e reja nëpër parti, në mënyrë që para elektoratit të prezantohen figura me peshë.
Nisur nga kjo, Ballkani.info mëson se sot në AAK do të aderojë një grup i Drenicës që deri më tash ishin pjesë të PDK-së.
Këtij aderimi do t’i prijë Naim Bazaj, i cili në zgjedhjet e fundit partiake të PDK-së ishte kandidat për degën e kësaj partie në Drenas.
Bazaj, siç merr vesh Ballkani.info, sot në shtëpinë e tij do të pres kryetarin e AAK-së, Ramush Haradinaj ku edhe zyrtarisht do t’i bashkohet partisë së kryeministrit në dorëheqje.
Bashkë me Bazajn në AAK pritet të aderojë edhe grupi i tij, i cili përbëhet nga së paku 300 persona.
Të kujtojmë se ditë më parë, Bazajn e kishte takuar deputeti i AAK-së, Daut Haradinaj. /Ballkani.info/