Organizata Botërore e Shëndetësisë thotë se të gjitha dëshmitë tregojnë që koronavirusi i ri ka një origjinë shtazore dhe nuk është një virus “i manipuluar ose i krijuar” në laborator ose diku tjetër.
Zëdhënësja e OBSh-së Fadela Chaib vuri në dukje se me siguri ka një mbartës të ndërmjetëm që e kaloi sëmundjen nga lakuriqët e natës te njerëzit.
“Kemi pandeminë me virusin, por po luftojmë gjithashtu ‘infodeminë’. Dhe kur ka një virus të ri, si ky, pritet që të nxirren shumë teori të pavërteta për origjinën e virusit”.
Ajo shtoi se OBSh-ja i mirëpret të gjitha vendet të bëjnë përpjekje për të gjetur origjinën e virusit dhe se tani disa grupe pune, duke përfshirë ekspertë kinezë, po përpiqen të gjejnë përgjigjen lidhur me këtë.







