Miqtë e farefisi nuk dolën të jenë vetëm për dasma. Njëjtë siç për dasma nuk po dalin të jenë as zyrtarët e afërt me pushtetin.
Si familjarët, si zyrtarët e lartë të partive në pushtet, po vazhdojnë të emërohen e të marrin pozita nëpër ndërmjarrje publike e institucioneve të pavarura.
Një situatë e tillë po del se vazhdon edhe në Bordet e ndryshme. Rasti që ndodhi së fundmi është Bordi i Pavarur për Miniera e Minerale.
Zyra e Kryeministrit ka njoftuar se ka miratuar listën me gjashtë emra të kandidatëve për Bordin e Pavarur për Miniera e Minerale, prej të cilëve Kuvendi do t’i zgjedhë tre prej tyre.
Emrat e dërguar në Kuvend nga qeveria janë: Habib Basholli; Nasuf Mjekiqi; Bahri Karaça; Avdi Mjeku; Hasan Preteni; Kaltrinë Demiri.
Kaltrina Demiri është njëra nga kandidatet kryesore për t’u emëruar në bordin e këtij institucioni.
Demiri edhe zyrtarisht e publikisht nuk e fsheh aktivitetin e saj politik. Madje, në faqen zyrtare të Listës Guxo, ajo figuron si anëtare e kryesisë së degës së Prishtinës, raporton Nacionale.
Ajo në rrjetet sociale, nuk e ka fshehur se i takon këtij subjekti politik.
Merr pjesë në mbledhjet e Këshillit të Përgjithshëm, takohet me deputetin Haxhi Avdyli, e ministrat Donika Gërvalla e Faton Peci.
Mbetet të shihet nëse përkrahja masive për Guxon, do t’i shpërblehet edhe me votë në Kuvend.
Kapjet e tjera
Vetëm brenda një muaj partia në pushtet ka vendosur njerëzit e saj në krye të Bankës Qendrore të Kosovës dhe në Korporatës Energjetike e Kosovës.
Hiç me larg se dje është emëruar ushtrues i detyrës së Kryeshefit Ekzekutiv të KEK-ut aktivist i VV-së, Bekir Gërgurin.
Ndërsa, në një pozitë më poshtë, atë të Zv. Kryeshefit Ekzekutiv, është emëruar Ramadan Budakovën.
Bekir Gërguri kishte kandiduar për asambleist të Vetëvendosjes në Komunën e Fushë Kosovës. Ky i fundit, në këtë pozitë e ka zëvendësuar Nagip Krasniqi, i cili po ashtu ishte zyrtar i VV-së.
Ndërsa, një muaj me parë, pushteti i Kurtit ka rrumbullaksuar “kapjen” e BQK-së, duke e emëruar zv/guvernator në këtë institucion Milot Cakajn, i cili në mandatin e parë të Qeverisë Kurti kishte qenë këshilltar i kryeministrit.
Pas Bashkim Nurbojës që ishte kandidat për deputet e për kryetar të Pejës nga VV-ja, dhe pas Nexhat Kryeziut gjithashtu kandidat për deputet, një tjetër i afërt me pushtetin është dërguar në BQK.
Fjala është për Milot Cakajn. BQK-ja ka njoftuar se Cakaj është emëruar zv/guvernator në këtë institucion.
“Përzgjedhja është bërë sipas kërkesave të Ligjit të BQK-së përmes një procesi konkurrues dhe meritor, me propozim të Guvernatorit. Zëvendësguvernatorët e emëruar znj. Nesrin Shileku – Shala dhe z. Milot Cakaj do të jenë përgjegjës primar për fushën e Mbikëqyrjes Financiare, Praktikat e Tregut, Rishqyrtimin dhe Shërbimet e Përgjithshme. Të tre zëvendësguvernatorët së bashku me Guvernatorin përbëjnë Bordin Ekzekutiv, vendimet e të cilit janë kolegjiale”, ishte thënë në njoftimin e BQK-së.
Cakaj në mandatin e parë të Qeverisë Kurti kishte qenë këshilltar i kryeministrit. Për këtë, ishte njoftuar edhe zyrtarisht.
Nacionale kishte raportuar në vazhdimësi për kapjen publike që pushteti ia bëri Bankës Qendrore të Kosovës.
Fillimisht në Bord u dërguan dy anëtarë të Vetëvendosjes si Bashkim Nurboja e Nexhat Kryeziu, e gjithashtu edhe Nora Latifi-Jashari që ishte dikur drejtoreshë në Institutin GAP.
Pas skadimit të mandatit të Fehmi Mehmetit, guvernator në BQK u emërua nga Kuvendi, Ahmet Ismaili. Madje, kontradikta ishte sepse në konkursin e parë që ishte shpallur, Kuvendi kishte vlerësuar se Ismaili nuk i plotëson kushtet, e në konkursin e dytë ai u zgjodh guvernator.







