Zv/kryeministri Abazi dhe ministrja Haxhiu i reagojnë Thaçit: Vendimi i Qeverisë në pajtim me Kushtetutën, largohu!
Zëvendëskryeministri i dytë i Kosovës, Haki Abazi, ka arsyetuar masat e Qeverisë së Kosovës për ndalimin e lëvizjes së qytetarëve, raporton KP-ja.
Ai ka thënë vendimi i sontëm i Qeverisë për kufizimin e lëvizjes së qytetarëve është në pajtim me Kushtetutën. Reagimi i tij vjen pas atij të presidentit Hashim Thaçi, se me këtë vendim u shkel Kushtetuta.
“Neni 55, paragrafi 1 i Kushtetutës lejon kufizimin e të drejtave të njeriut në pajtim me ligjin. Kufizimi i lirisë së lëvizjes në vendimin tonë bazohet në Ligjin për Parandalimin dhe Luftimin e Sëmundjeve Ngjitëse, neni 41.2, i cili lejon ‘ndalimin i qarkullimit në rajonet e infektuara ose drejtpërsëdrejti të rrezikuara’”, ka thënë Abazi.
Ai ka përmendur nenin 55 ,sipas të cilit autorizohet kufizimi i lirisë së lëvizjes.
“Përveç nenit 55, paragrafi 1, kufizimi i lirisë së lëvizjes në rastin konkret, përmbush edhe kriteret e tjera të nenit 55: Sipas vlerësimit të IKShPK-së, ky kufizim është i domosdoshëm për përmbushjen e një qëllimi legjitim, atij të mbrojtjes së shëndetit publik. Sipas këtij vlerësimi të IKShPK-së, nuk mund të parandalohet përhapja e virusit në mënyrë efikase, pa vendosur këto kufizime. Prandaj, kufizimi i lirisë së lëvizjes në vendimin e sotëm, është në pajtim me Kushtetutën”, është shprehur Abazi.
Në lidhje me reagimin e presidentit Thaçi për vendimin e Qeverisë, ka reaguar edhe ministrja e Drejtësisë, Albulena Haxhiu.
“Ai që e ka përdhosur Kushtetutën pothuajse në secilin NEN të saj, del e flet për Kushtetutën! Sipas asaj që kuptova, Presidenti do që qytetarët të futen në konflikt me policinë. Ai bëri thirrje për anarki. Kjo është e papranueshme e sidomos kur kjo vjen nga Presidenti. Ky President duhet të largohet. Vendimi është i ligjshëm dhe në përputhje me masat kufizuese pra kundër përhapjes së virusit corona dhe për ruajtjen e shëndetit dhe jetës së qytetarëve!”, ka shkruar Haxhiu në Facebook.
