Vetëvendosje sqaron se kur u punësua Arta Dehari në kabinetin e Konjufcës
Gjatë mbrëmjes së sotme u raportua në media se Arta Dehari, gruaja e aktivistit të ndjerë të Lëvizjes Vetëvendosje, Astrit Dehari, është punësuar në kabinetin e kryetarit të Kuvendit të Kosovës, Glauk Konjufca, pasi ky i fundit mori pozitën e kreut të Kuvendit.
Një lajm të tillë, e ka sqaruar për opinionin Arlind Manxhuka, zëdhënës i Lëvizjes Vetëvendosje, duke i quajtur të pabaza raportimet se ajo u punësua së fundi në kabinetin e Konjufcës.
Ai ka bërë të ditur se Arta Dehari, nuk është punësuar tani kur Konjufca është bërë kryeparlamentar, porse ajo ka punuar si asistente e grupit parlamentar të Vetëvendosjes në legjislaturën e kaluar.
Arta Dehari së paku që nga legjislatura e kaluar ka punuar si asistente e grupit tonë parlamentar. Është e turpshme se si disa portale pa e kontaktuar as atë e as Lëvizjen nxjerrin lajme kinse tash është punësuar meqenëse Glauk Konjufca është bërë Kryeparlametar. Janë po këto media që edhe kur Kuvendi i kësaj legjislature s’ishte i konstiutuuar e Artën e kanë parë në Kuvend gjatë takimeve VV-LDK”, ka thënë Manxhuka përmes një sqarimi në rrjetin social Facebook.
